Besimtarët myslimanë anëkend botës, kremtojnë sot të dytën festë të tyre, Kurban Bajramin. Që në orët e para të mëngjesit, bulevardi ‘Dëshmorët e Kombit’ në Tiranë, siç dhe në shumë qytete të tjera, u mbush me qindra e mijra besimtarë të cilët falën namazin e kësaj feste.
Kurban Bajrami lidhet me ritualin e Haxhit që zhvillohet në Mekë dhe rrënjët e veta i ka tek një episod kur`anor mes profetit Ibrahim dhe djalit të tij Ismail, po ashtu me profet.
At e bir njihen si ndërtuesit e Qabesë, shtëpisë së Zotit në tokë; dhe mes tyre ndodhi një akt i madh sprove, siç ishte një ëndërr e Ibrahimit për të flijuar të birin, Ismailin, e frymëzuar nga Zoti.
Që të dy binden pa një pa dy për ta çuar në vend urdhërin e Zotit; por e në çastin final, Zoti dërgon një dash prej qiellit, që pikërisht kafsha të bëhej kurban dhe jo njeriu, aq më tepër prej njeriut.
Sipas dijetarëve fetarë, urtësia e urdhërit, ishte bindshmëria e paluhatshme e dy njerëzve besimtarë, devotshmëria e tyre, të cilët bëjnë atë u urdhërohet nga Krijuesi i tyre, edhe nëse në dukje mund të mos u pëlqejë.
Ndërkohë që po sipas dijetarëve, në episodin e jashtëzakonshëm mes Ibrahimit dhe djalit të tij, Ismailit, burojnë shumë mesazhe madhore, përfshirë dhe atë që kurrsesi nuk duhet derdhur gjak njeriu; se jeta është e tij shenjtë.
Kjo ditë shoqërohet me akte të shumta bamirësie, pasi mishi i kurbanëve të therrur nuk përdoret thjesht për tu konsumuar nga besimtarët, por ai u dhurohet njerëzve të pamundur, kudo që të ndodhen dhe pavarsisht se çbesimi i përkasin. /tesheshi.com/
