Festa e Kurban Bajramit ka bashkuar deputetë të PD dhe PS. Pavarësisht replikave dhe akuzave në distancë pas zgjedhjeve të 25 qershorit, këtë rradhë ligjvënësit e dy partive kryesore në vend ishin të pranishëm në pritjen e dhënë nga Myftinia e Elbasanit.
Edmond Spaho dhe deputetët e PD nga një anë dhe Taulant Balla, Qazim Sejdini e ligjvënës të PS në anën tjetër, nuk kanë nguruar të bëjnë batuta mes tyre, të ngjashme me ato të fushatës për zgjedhjet, ku dy partitë lidheshin nga marrëveshja e 17 majit e firmosur nga kryeministri Edi Rama dhe kreu i PD-së, Lulzim Basha.
Sikundër raportohet, ishte ligjvënësi demokrat Luçiano Boçi që lëshoi batutën në drejtim të kolegëve të tij të PS, kur tha se “mezi që po na prisnit të shtrëngoni duart me ne, madje për tu siguruar që ne ishim këtu çuat edhe dikë për të parë”.
Por, kjo batutë e Boçit nuk ka mbetur pa përgjigje pasi një nga ligjvënësit socialistë tha “ju erdhët të parët dhe nuk po ju durohej sa të vinim ne që të na takonit”. /tesheshi.com/
