“Kurani”, pas SHBA-së dhe BE: Ligjorja, jo domosdoshmërisht morale!

Kryediplomati europian Josep Borrell, pas një  djegieje të Kuranit në Suedi dhe Danimarkë, deklaroi se refuzon çdo veprim që do të nxiste urrejtjen fetare.

“Në kontekstin e veprimeve nga disa në Evropë që ofendojnë shumë myslimanë, BE-ja përsërit refuzimin e saj të fortë dhe vendimtar të çdo forme të nxitjes së urrejtjes dhe intolerancës fetare,” tha Borrell.

Duke theksuar se respekti për komunitetet fetare është pjesë e vlerave të BE-së, Borrell tha se “mosrespektimi i Kuranit apo i ndonjë libri të shenjtë është një provokim i hapur”.

Duke vënë në dukje se racizmi, ksenofobia dhe intoleranca nuk kanë vend në BE, Borrell vazhdoi:

“Ne do të vazhdojmë të mbështesim lirinë fetare dhe lirinë e shprehjes brenda dhe jashtë vendit. Por jo gjithçka ligjore është dhe morale. Tani është koha për mirëkuptim dhe respekt të ndërsjelltë. Këto akte provokatorësh u shërbejnë vetëm interesave të atyre që duan të na ndajnë ne dhe shoqëritë tona”.

Ky reagim i ashpër nga Brukseli vjen pas rastit të fundit, atij në Kopenhagen, ku një dyshe nga grupi “Patriotët Danezë” shkelën mbi Kuranin të hënën dhe e dogjën pranë një flamuri irakian të shtrirë në tokë. /tesheshi.com/