Jup Hejkens e ka marrë me filozofi rikthimin tek Bajerni i Mynihut. “Plaku” “ua di kokën” lojtarëve dhe ka rikthyer rregullin dhe harmoninë në grup.
Përveçse ka bërë që “senatorët” e skuadrës të rikthehen si liderë në fushë, duke aktivizuar në ndeshjen ndaj Frajburgut, si Boatengun, ashtu edhe Roben, Humels apo Myler, 73-vjecari ka vendosur edhe disa rregulla absolute, që në pamje të parë duken qesharake, por që ai ua imponon me seriozitet “gjermani” të gjithëve, pa përjashtim.
Kështu, futbollistët janë të detyruar që pasi të mbarojnë stërvitjen, të hanë së bashku. E gjatë tryezës, ka edhe batuta, edhe biseda serioze, edhe shkëmbim mendimesh për kundërshtarin.
Po kështu, ata “janë të detyruar” të lënë pastër dhomat e zhveshjes. Pra të mos ketë rrëmujë, të mos ketë bluza apo çorape e këpucë të hedhura andej-këtej, që punonjësja e pastrimit të ketë vërejtje.
Gjithashtu, lojtarët janë “të urdhëruar” t’u flasin të gjithë punonjësve të klubit, atyre të pastrimit, mirëmbajtjes, kopshtarëve, masazhatorit etj.
Sipas filozofit Hejkens, kjo i bën mirë familjarizimit.
Me këto detaje është duke u marrë “Plaku” që kurse rimori Bajernin e tij.
A kanë rëndësi këto apo jo për ecurinë e një superklubi si Bajern?
Kjo mbetet për t’u vërtetuar, por po flasim për një trajner që i dha klubit 3 trofe në një sezon, si askush tjetër më parë. Ndonjëherë, “Plakut” i duhen duruar edhe…”huqet”…/tesheshi.com/
