Pak orë para hapjes së vendvotimeve kanë nisur edhe përplasjet e para rreth mënyrës së votimit në komunat verirore të Kosovës, pra nëse serbët e komunave veriurore duhet të lejohen të votojnë me letërnjoftime të Serbisë.
E gjitha ka nisur pas një deklarate të bërë nga shefi i misionit të OSBE-së në Kosovë, Jan Braathu, i cili ka deklaruar se sipas udhëzimeve të Komisionit Qendror të Zgjedhjeve qytetarët e veriut do të mundë të votojnë edhe me letërnjoftim të vlefshëm të Serbisë.
“Ne ndjekim udhëzimet e KQZ-së dhe kjo e fundit ka marrë një vendim për të ndjekur Ligjin Zgjedhor. Në Ligjin Zgjedhor ka një listë të dokumenteve të pranuara: letërnjoftimet e vlefshme, që do të thotë, edhe para dialogut të Brukselit por që është rikonfirmuar edhe në dialogun e Brukselit, identitete të vlefshme serbe, patentën e shoferit. Është e shkruar qartë ashtu”, ka thënë Braathu.
Por, kjo deklaratë ka ngjallur reagime të ashpra nga deputet të Lëvizjes Vetëvendosje dhe anëtarë të saj brenda KQZ-së. Ky i fundit ka sqaruar në detaje se me çfarë dokumente kanë të drejtë qytetarët të votojnë.
“Deklaratë e papranueshme që cenon rendin juridik”
Deputetja e Vetëvendosje-s, Albulena Haxhiu thotë se deklaratën e ambasadorit të OSBE-së e quan të papranueshme dhe skandaloze.
Ajo thotë se së pari është i papranueshem fakti se si Veriu gjithnjë shihet ndaras pjesës tjetër të vendit dhe një qëndrim i tillë sipas saj është në kundërshtim me rendin juridik e kushtetues.
“Institucionet e Republikes se Kosoves, gjegjesisht zyrtarët e përfshirë në administrimin e zgjedhjeve po ashtu edhe policia e prokuroria duhet të tregohen vigjilent dhe të qendrojnë në mbrojtje të rendit kushtetues dhe të sovranitetit të Republikës, sikurse edhe të procesit zgjedhor në tërë territorin e Republikës”, thotë shkruan Haxhiu në Facebook.
Ja cilët qytetarë kanë të drejtë vote…
Ndaj deklaratës së amabsadorit Braathu ka reaguar edhe anëtarëri i KQZ-së nga Vetëvendosje, Adnan Rrustemi për të cilin është e papranueshme që serbët të votojnë me letërnjoftime të një shteti tjetër.
Ai thotë se në zgjedhjet e nesërme, të drejtë vote kanë vetëm shtetasit e Republikës, të regjistruar në regjistrin civil përmes pajisjes me letërnjoftim të Republikës së Kosovës.
Sipas tij mënyra se si krijohet lista e votuesve në Kosovë e determinon edhe se çfarë dokumente të identifikimit mund të përdorën në ditën e zgjedhjeve për të votuar.
Ai më tej thotë se Gjykata Supreme në vendimin e saj për votimin me kusht në zgjedhjet e 11 qershorit qartazi e ka vërtetuar se kërkohet numri personal i votuesve që e përmbajnë vetëm dokumentet e lëshuara nga institucionet e Republikës së Kosovës.
Rrustemi thotë se kushdo që deklarohet se në Veri mund të votohet me dokumente të Serbisë, bën qëndrim, siç thotë ai, në kundërshtim me rendin juridik, integritetin, si dhe me ligjet dhe Kushtetutën e Kosovës.
“Asnjë votues nuk është pjesë e listës së votuesve, nëse nuk është pajisur me letërnjoftim të Republikës së Kosovës, ose të paktën me letërnjoftim të UNMIK-ut. Po ashtu, asnjë votues që nuk është në listën e votuesve nuk mundet që të votojë. Prandaj të gjithë ata që veçse janë të regjistruar në listën e votuesve, veçse posedojnë letërnjoftim të Kosovës ose të paktën të UNMIK-ut. Refuzimi për të nxjerrë nga xhepi dhe për të përdorur letërnjoftimin e Kosovës nga votuesit në pjesën veriore, është vetëm refuzim i qëllimshëm i sovranitetit të Republikës dhe si i tillë në asnjë mënyrë nuk duhet të lejohet. Çfarëdo tolerimi që të votojnë me dokumente të Serbisë është sheshit legjitimim i pretendimeve të strukturave paralele të Serbisë dhe të vet Serbisë. Në anën tjetër, në secilin shtet demokratik dhe me sovranitet votohet vetëm me dokumente të atij shteti. As që diskutohet votimi eventual me dokumente identifikuese të një shteti tjetër”, shkruan Rrustemi në Facebook, i cili fton që policia ditën e zgjedhjeve të jetë në mbrojtje të rendit kushtetues dhe të sovranitetit të Republikës, sikurse edhe të procesit zgjedhor në tërë vendin.
Kujtojmë se serbët e veriut të Kosovës edhe në zgjedhjet e 11 qershorit pa u penguar në komunat Zveçan, Leposaviq, Zubin Potok dhe Mitrovicë të Veriut, kanë votuar me letërnjoftime të cilat i lëshon Ministria e Punëve të Brendshme e Serbisë.
Përgatiti: Blendi Gashi – tesheshi.com
