Në ora 9:45 paradite çdo ditë, më shumë se 1,000 rosa Indian Runner, lëshohen nëpër vreshtin Vergenoegd të qytetit Stellenbosch, në Afrikën Jugore.
Misioni i tyre është të kërkojnë dhe të hanë mijëra kërmij të vegjël të bardhë nëpër hardhitë e rrushit.
“Para se të mbaja rosa, më duhej të hedhja pesticide si karrem për kërmijtë. Por, nëntë vitet e fundit sa punoj këtu, nuk kemi përdorur pothuajse fare pesticide, pasi rosat i hanë gjitha kërmijtë dhe insektet e tjera”, – thotë Marlize Jacobs, vreshtare dhe horktikulturaliste.
Të përdorura me shekuj në Azi për të kontrolluar insektet e dëmshme, këto rosa qëndrojnë drejtë si pinguinët dhe janë të hollë aq sa të mund të lëvizin lirshëm në mes të rreshtave të hardhive. Ato nuk ecin duke u tundur, por vrapojnë.
“Kopeja, e cila fillimisht ka numëruar gjashtë rosa në vitin 1983, i ka mundësuar vreshtit Vergenoegd të përdorë aq pak kimikate në sipërfaqen prej 57 hektarë, sa që nuk ka nevojë t’i deklarojë fare ato”, – thotë Jacobs.
Duke marshuar si ushtarë për çdo ditë nëpër fermë, këta zogj udhëhiqen nga një bari, dhe janë në gjendje të pastrojnë një sipërfaqe prej gjysmë deri një hektar brenda ditës nga kërmijtë, të cilët përpos që shkaktojnë sëmundje kërpudhore, konsiderohen si dëmtuesit kryesor të hardhive të rrushit në fermë. /tesheshi.com/
