Presidenti rus Vladimir Putin e krahasoi sot politikën e tij me atë të Pjetrit të Madh, kur Cari ishte në luftë me Suedinë dhe pushtoi territoret e saj, si dhe Finlandën, pjesë të Estonisë dhe Letonisë.
Më herët kishin shpërthyer skenarë për shëndetin e tij pasi ai kishte anuluar daljen në programin pyetje-përgjigje televizive me pjesëmarrjen e qytetarëve.
Por tani ai është shfaqur në ekspozitën për 350-vjetorin e lindjes së Pjetrit të Madh.
“Sapo kemi vizituar një ekspozitë kushtuar 350-vjetorit të lindjes së Pjetrit të Madh. Është tronditëse, por pothuajse asgjë nuk ka ndryshuar (…) Pjetri i Madh e zhvilloi Luftën e Madhe Veriore për 21 vjet. Dikush do të kishte përshtypjen se kur ishte në luftë me Suedinë, ai mori diçka prej tyre. Ai nuk mori asgjë prej tyre, ai e ktheu (në Rusi) atë që ishte e saj,” u tha Putin biznesmenëve të rinj në Moskë.
“Kur themeloi një kryeqytet të ri (s.a. Shën Petersburg), asnjë nga vendet evropiane nuk e njohu këtë territor si rus. Të gjithë e konsideronin si pjesë të Suedisë. Por sllavët kanë jetuar atje që nga kohra të lashta, pranë popujve fino-ugikë. Merrini dhe forconi këto territore”, shtoi ai.
“Natyrisht, na takon neve të marrim (atë që i përket Rusisë) dhe të forcojmë” (vendin),” vazhdoi ai, me sa duket duke iu referuar pushtimit rus të Ukrainës.
“Po, ka pasur momente në historinë e vendit tonë kur jemi detyruar të tërhiqemi, por vetëm për të riorganizuar forcat tona dhe për të ecur përpara”, përfundoi ai.
Pjetri i Madh, një sundimtar autoritar dhe në të njëjtën kohë modernizues, sundoi për 43 vjet dhe i dha emrin e tij një kryeqyteti të ri, Shën Petersburg – nga vjen Putin – të cilin e ndërtoi në territorin e pushtuar nga suedezët.
Humbja e Suedisë në Luftën e Madhe Veriore (1700-1721) e bëri Rusinë fuqinë kryesore në Balltik dhe një faktor të rëndësishëm që ndikonte në çështjet evropiane. /tesheshi.com/
