Nga Blendi Gashi
Një precedent i ndodhur dje në mbledhjen e komisionit për Stabilizim – Asociim të Kuvendit të Kosovës, tregon dy standartet me të cilat veprohen pushteti karshi medias.
Ministri i Jashtëm, Enver Hoxhaj kërkoi që takimi të mbahet me dyer të mbyllura, kërkesë kjo që u miratua nga kryetari i komisionit Xhavit Haliti. Thënë ndryshe, mediat u zbuan.
Por Ministria e Jashtme, përmes zëdhënësit të saj Bashmir Xhemaj ka mohuar që Hoxhaj të ketë kërkuar që gazetarët të mos lejohen në takim, duke thënë se Kuvendi ka përcaktuar formatin e tij.
E pavarësisht nëse urdhëri është dhënë nga Haliti apo Hoxhaj, kjo qasje tregon qartë se pushteti e llogarit median vetëm kur ajo nevojitet për t’i bërë reklamë, në të kundërt ia përplas derën në fytyrë.
Nga ana tjetër, veprimi i Halitit bie ndesh me Rregulloren e Kuvendit, konkretisht Nenin 65, ku mbledhjet mund të mbahen të mbyllura kur diskutohet vetëm për çështje të sigurisë nacionale, për ndonjë kontratë komerciale konfidenciale e të tjera; ndaj kjo nuk i pengoi deputetët e mazhorancës dhe të një pjese të opozitës që të reagonin duke kërkuar qëndrimin e mediave në takim. Deputetja Donika Kadaj-Bujupi nga Lëvizja Vetëvendosje, një prej atyre emrave që reagoi fort, në një prononcim për tesheshi. com, sha arsyet e saj pse mediat u lanë jashtë.
“Kjo qasje dhe mbyllje për media dëshmon se pushteti nuk dëshiron dhe nuk lejon që opinioni përmes mediave të informohet për (mos) punën, konkretisht dështimin e ministrive përkatëse në zbatimin e MSA-së”.
Ajo u shpreh se me mbylljen e takimeve opinionit publik i pamundësohet të dëgjoi argumentet e Vetëvendosje-s për zbatimin e marrëveshjes për Stabilizim Asociim.
“Është e nevojshme që Komisionet të jenë të hapura, dhe që deputetët e opozitës të dëgjohen kur ngriten çështjet që e ballafaqojnë Qeverinë. Ekziston një përpjekje që të evitohet dhe të pamundësohet që qytetarët të kuptojnë të vërtetën e kësaj qeverie”.
Kadaj-Bujupi theksoi më tej e raportimet e ministrave zakonisht po bëhen në formë të ekspozesë, duke shtuar se tentuar t’i ikin ballafaqimit më pyetje, për arsye se sipas saj, fjalët e tyre janë në kundërshtim me realitetin.
Ja ç’thanë Haliti e Hoxhaj pas takimit
Pas përfundimit u deklaruan edhe kryetari i komisionit, Xhavit Haliti, dhe ministri Enver Hoxhaj por nuk treguan pse kanë dashur që takimi të mbahen i mbyllur.
Haliti thurri lëvdata për raportimin e ministrit Hoxhaj, duke thënë se ky lloj informimi është i domosdoshëm dhe se do t’i shërbejë më mirë organizimit institucional, por nuk tregoi se cilat ishin pyetjet dhe vërejtjet që ja parashtruan anëtarët e komisionit ministrit të Jashtëm.
Ndërsa pas takimit dy orësh u deklarua dhe vet Hoxhaj i cili tha se kanë biseduar për çështjen e Demarkacionit me Malin e Zi dhe për gjendjen në rajon, dhe për harmonizimin e politikës së jashtme mes Kosovës dhe BE-së.
Portali ynë ka tentuar të marrë qëndrime edhe nga anëtarët e tjerë të komisionit si nga pozita ashtu dhe opozita por ata nuk kanë dashur të deklarohen.
Ja ç’thotë Neni 65 për mbledhjen e komisioneve parlamentare:
Dispozita plotësuese për komisionet
- Mbledhjet e komisioneve të Kuvendit, në parim, janë të hapura, përveç në rastet kur një
komision:
- a) diskuton çështje konfidenciale të sigurisë në Kosovë,
- b) diskuton detaje të kontratave komerciale, në të cilat institucionet e Republikës së Kosovës
hyjnë me një palë të tretë, ku diskutohet për çështje komerciale konfidenciale,
- c) përgatit projektrekomandimet ose rekomandimet përfundimtare, duke e përfshirë edhe
hartimin e raporteve të rëndësishme për Kuvendin,
- d) e vlerëson ndryshe. /tesheshi.com/
