Nga Blendi Gashi
Një pankartë e prezantuar në Kuvendin e Kosovës të enjten nga deputetët e Vetëvendosje-s me fotografi të zyrtarëve të shtetit, në mesin e tyre edhe të drejtorit të RTK-së, Mentor Shala dhe redaktorit të këtij medium, Ridvan Berisha, ka bërë që të rikthehet p 137rplasja mes tyre.
Deputetja e VV-së, Albulena Haxhiu, gjatë fjalimit të saj para ligjvënësve për mveshjen e akuzës për terrorizëm ndaj aktivistëve, bëri fajtor edhe dy drejtuesit e televizionit publik, ku tha se ata do japin llogari morale dhe penale.
Nuk vonoi shumë dhe plasën reagime nga drejtuesit e medias në fjalë, organizata që mbrojnë gazetarët dhe themelues mediash.
Futja e drejtorit dhe kryeredaktorit të RTK-së në një “thes” me politikanë, u cilësua linçim ndaj fjalës së lirë dhe veprim që duhet i thënë “Stop”.
“Gjuhë linçuesve e VV-së”
Mentor Shala, drejtor i RTK-së, ka reaguar ndaj aksionit të partisë që drejtohet nga Visar Ymeri.
“Kur në një vend (shtet) politika (pozitë e opozitë) e sulmon gazetarin ose mediumin, ai vend ka predispozita për diktaturë! Linçimet publike dhe thirrjet për likuidim të gazetarëve dhe shkatërrimit të mediave nga subjekte të caktuara politike (në këtë rast VV) janë praktika të njohura dhe të dëshmuara në regjimet totalitare e diktatoriale. Fatkeqësisht në Republikën e Kosovës ka subjekte politike me orientime të tilla”, thotë ai.
Se VV po përdor gjuhë linçuese mendon edhe kryeredaktori Ridvan Berisha.
“Është trishtuese dhe lekesion thellëisht zhgënjyes për demokracinë – gjuha linçuese e VV!”, ka shkruari ai.
Edhe kryetari i Asociacionit të Gazetarëve të Kosovës, Shkëlqim Hysenaj, ka reaguar, duke e quajtur askionin e VV-së të turpshëm.
“Ky është një akt i turpshëm. Linçimi dhe mveshja e akuzave të tilla siç po bënë Vetëvendosje me kolegët gazetarë të RTK-së është treguesi më i fortë se tendenca për kontrollimin e mediave nuk fillon e as nuk mbaron me këtë pushtet”, ka shkruar ai.
Edhe drejtori i gazetës online “Blic”, Astrit Gashi, aksionin e VV-së e quan linçim publik ndaj gazetarëve e punonjësve të mediave, për çka bën apel që të ndërpitet menjëherë.
“Secili që ka hatërmbetje apo papajtueshmëri me punën e cilitdo gazetarë le t’i drejtohet instancave të tjera , por ‘zbulimi’ i gazetarëve si fajtor dhe më pas plasimi i tyre në publik me këtë akuzë, asnjëherë nuk do t’i shërbejë zbardhjes të së vërtetës, por do të jetë në funksion të kanosjes së lirisë së shtypit e të shprehjes. Kjo për secilin njeri që beson në lirinë e shprehjes, është neveritëse dhe e papranueshme. Vetëvendosje duhet të ndërprejë këtë praktikë frikësuese, nëse vërtetë si parti angazhohet për sistem të së drejtës e lirive njerëzore e të medias. Veprimet e këtilla, të përsëritura, janë të papranueshme dhe të pa tolerueshme!”, thotë Gashi.
“Mentori shërbyes i regjimit, do përfundojë prapa grilave”
Reagimeve të drejtuesve të RTK-së, shoqërisë civile dhe kreut të AGK-së, i është kundërpërgjigjur deputetja Haxhiu e cila ka mohuar që VV të ketë sulmuar ndonjë gazetar, duke thënë se soji i Mentor Shalës nuk është gazetar, por një shërbyes i regjimit “Pronto”.
“Ky gënjeshtar që flet për likuidim gazetarësh dhe për totalitarizëm e diktaturë është shërbyes i një regjimi kriminal e gjysmë-autoritar, i cili në stilin gebellsian e filloi fushatën ndaj Lëvizjes Vetëvendosje” me synimin që të shpallet terroriste.
Ne kërkojmë që ky njeri, me gjithë përgjegjësit e tjerë që u përpoqën që të montojnë rastin e aktivistëve tanë, të përgjigjen para drejtësisë për veprimet e tyre. Mentorin dhe të tjerët do t’i mbajmë përgjegjës për padrejtësinë ndaj gjashtë aktivistëve të arrestuar, për vdekjen e Astritit që u arrestua pa asnjë provë dhe humbi jetën në rrethana të dyshimta. Nuk do të ndalemi në asnjë moment së kërkuari drejtësi dhe kjo e fundit nënkupton që Mentori dhe miqtë e tij nga klani ‘Pronto’ të jenë prapa grilave. Demokracia do të thotë sundim i popullit e jo sundim i klanit ‘Pronto’”, thotë Haxhiu.
Ndryshe, në muajin tetor të vitit të kaluar, aktivistë të VV-së përmes një aksioni simbolik e kanë shpallur Radio Televizionin e Kosovës – Ministri e Propagandës dhe Agjitacionit, ndërsa drejtorin, Mentor Shalën, ministër të saj. /tesheshi.com/
