Kur nuk ekzistonte godina e Kinostudios, ajo që sot është Ministria e Kulturës, e që për ca vite ishte dhe pronë e Koço Kokëdhimës, ata që kishin nisur të merreshin më filmin në vitet e para pas Çlirimit, ishin në hall për një ambient pune.
Një shkresë e datës 10 qershor të vitit 1947, firmosur nga drejtuesi i të quajturës Ndërmarrje Kinematografike Shqiptare, Koço Marko, zbulon se cilat ishin godinat në tiranë të cilat të piketuar për t’u shndërruar në paraardhësen e Kinostudios së famshme. Bie në sy fakti se ato ishin prona private, ku njëra prej tyre i përkiste mjekut të njohur Shefqet Ndroqi.
Ja çfarë shkruan Koço Marku në shkresën e tij:
Republika Popullore e Shqipërisë
Ndërmarrja shtetnore Kinematografike shqiptare
Tiranë
Nr.prot. 456.
V.F.L.P.
Tiranë më 10/ VI/ 1947
Komitetit Artit dhe Kulturës
Këtu
Me shkresën tonë Nr.101, datë 25.II.47 I jemi drejtuar kryeministrisë që t’na vërë në dispozicionin tonë, një ndërtesë e cila si në madhësi ashtu edhe në çdo pikpamje tjetër, të jetë e mjaftueshme dhe e përshtatshme me karakterin e punës dhe materjalin që është mjaft delikat dhe që kërkon një kujdesje shumë të madhe.
Po meqenëse rreth kërkesës tonë si ma sipër nuk kemi marrë akoma ndonji përgjigje, lutemi të ndërmjetësoni që t’na epet qoftë edhe (pergjigje) negative.
Shtojmë nga ana tjetër se në qoftëse përgjigja e kryeministrisë sdo të jetë negative në këtë drejtim, atëherë I lutemi të ndërmjetësohet dhe të insistohet që të vihet në dispozicionin tonë nji nga këto tre ndërtesa, të cilat pasi u panë, janë gjetur të përshtatshme për punën tonë.
Këto janë:
- Ndërtesa ku banon dhe ka klinikën dr. Shefqet Ndroqi. Është në rrugën e ish postës.
- Ndërtesa e Riza Beshirit, ndodhet në rrugën e barrikadave dhe ma preçiz banon dentist Xhevdet Asllani.
- Ndërtesa ku banon dhe ka klinikën Dr. Xhavit Gjata, ndodhet në fund të Rrugës së Barrikadave.
Nga këto tre ndërtesa , më e përshtatshmja dhe që na përmbush plotësisht nevojat tona , asht ajo që përmendet në pikën 2 të kësaj shkrese, prandaj do të ishte mirë që ndërhyrja juaj të insistojë ma tepër për këtë ndërtesë.
Lutemi të na njoftohet mbi përfundimin e çështjes si ma sipër.
Drejtori Koço Marko
Nga Komiteti i Arteve, kjo shkrese i ishte dërguar dy ditë më vonë Kryeministrisë, prej nga vjen përgjigja me 16 qershor, duke thënë se ajo duhej t’i drejtohej Komitetit Ekzekutiv të Prefekturës së Tiranës.
Shkresat nuk tregojnë se ç’zigjidhje ju dha Ndërmarrjes Kinematografike Shqiptare e cila funksionoi edhe për 5 vjet pa një godinë të sajën të dedikuar. Siç dëshmon edhe kjo foto nga ndërtimi i godinës sovjetike të Kinostudios “Shqipëria e Re”, ndërtimi saj nisi vetëm në vitin 1952. /tesheshi.com/
