“N’trashet zullumi’ për parkun e lodrave në Liqenin Artificial të Tiranës. Siç e ka bërë të ditur tesheshi.com në një shkrim të para disa ditëve, fshehja e interesave multimilionëshe në euro në këtë hapësirë ka vendosur dy pjesë të shtetit kundër njëri-tjetrit.
Siç mësohet nga burime të sigurta, në lojë përveç presidentit të Republikës janë përfshirë edhe Prokuroria dhe Kontrolli i Lartë i Shtetit.
Qëllimi: Të pezullohet urgjent ndërtimi i parkut të lodrave, i cili i bën nul të gjitha planifikimet për ndërtime banesash shumëkateshë dhe një rruge brenda parkut.
Është shumë e çuditshme që të ngrihet mbarë shteti dhe të luftojë për një kënd lojrash, ku do të ketë lisharëse, stola apo kolovajse.
Siç mësohet, në bazë të kërkesës së Partisë Demokaatike, pritet që Prokuroria të nisë hetim ndaj bashkisë së Tiranës për moszbatim të ligjshmërisë.
Nëse ndodh kjo, sipas të gjitha gjasave plani e pakta shtyhet, por ka shumë mundësi të anulohet.Dhe ky është qëllimi.
Një grup inspektorësh të Kontrollit të Lartë të Shtetit kanë mësyrë që prej ditësh në bashkinë e kryeqytetit, duke kërkuar të kontrollojnë të gjithë dokumentacionin.
Shpejtësia e Prokurorisë dhe e KLSH-së për këndin e lojrave bie ndesh me ritualin e tyre normal, kur asnjë zyrtar i korruptuar nuk është arrestuar; madje lirohen dhe ata që futen në burg, siç është rasti i Guvernatorit Fullani. Ndërkohë sot është liruar një person i cili akuzohet se vuri tritol tek farmacia e babait të Ministrit të Brendshëm.
Dhe në mesin e kësaj zallamahie, dje dhe sot ka pasur një përplasje shumë të ashpër ndërmjet Presidentit të Republikës dhe kreut të Bashkisë së Tiranës.
Dita e parë ishte vetëm për nxemje, ndërsa sot tensioni arriti parametra shumë të larta.
Presidenti i Republikës Bujar Nishani shkoi personalisht te Parku i Liqenit, takoi protestuesit në vendin ku po ndërtohet këndi i lojërave dhe doli para kamerave duke përdorur ton shumë të lartë. Nishani e cilësoi “vandalizëm” ndërtimin e këndit.
Eskorta e Presidentit madje shkeli ligjin duke u futur me makinë në një vend ku nuk lejohen automjetet.
Presidenti theksoi se “Ky vandalizëm që po i bëhet parkut, të vetmes pasuri qetësie, është i papranueshme. T’u marrësh dhe t’u prishësh fëmijëve të Tiranës parkun e vetëm dhe pronën e vetme publike, është vandalizëm me të cilën nuk mund të pajtohet askush. U takon në radhë të parë qytetërëve të Tiranës, djemve e vajzave, mendjehapur, për t’i rezistuar vandalizimit dhe vandalëve. Kjo lëvizje qytetare shkon përtej kauzës së vetme të parkut të liqenit, tashmë po lind dhe po nis një lëvizje qytetare për emancipim, civilizim, dhe unë ju përgëzoj për këtë”.
Kreu i shtetit tha se kryebashkiaku i Tiranës përdori një fjalor rrugaçëror ndaj tij.
Ndërkaq, Veliaj i është përgjigjur menjëherë duke i kërkuar Presidentit të mos bëhet” mitingash i rëndomtë”.
“A do të shkojë Presidenti te pallati 17-katësh te diga? Nuk besohet, sepse aty është pronari i shtëpisë ku rri Saliu e shpura e tij. Aty kanë prerë 274 pemë për atë pallat. Dhe thotë se kjo është e padrejtë. Kush është i pari i sistemit tonë të drejtësisë? Presidenti. Kur ishte hera e fundit që takoi një hallexhi në gjykatë? Kur është shprehur për gjyqin e Gërdecit apo 21 Janarit? Ai nuk do dhe nuk ka pasur qëllim që të hyjë në atë pjesë të historisë që ne të themi “Bravo i qoftë”. Nuk i bëj fresk një presidenti të diskredituar dhe qesharak, por punoj për fëmijët e Tiranës”, deklaroi Veliaj.
Përgatiti: Ylli Pata – /tesheshi.com/
