Njëri nga komandantët e Ushtrisë Jugosllave në Kosharë, Ljubinko Gjurkoviç, në dëshminë e tij të parë publike në vitin 2014 për betejën tashmë të famshme deklaroi se në kuadër të detashmentit vullnetar ndërkombëtar kishte luftëtarë nga “pjesa perëndimore e Ukrainës”, shkruan Rrjeti Ballkanik i Sigurisë.
Siç ka mësuar ky Rrjet nga pjesëmarrësit në luftime, në atë kohë gjashtë ukrainas ishin në radhët e Ushtrisë Jugosllave në vijën e frontit me kufirin verior shqiptar. Gjithsesi, askush nuk i lidhi ata me ndonjë organizatë politike.
Shumica e vullnetarëve të huaj ishin nga Rusia. Ukrainasit ishin në të ashtuquajturin Detashment Ndërkombëtar, i cili përbëhej nga rreth tridhjetë luftëtarë nga disa vende evropiane (Britania e Madhe, Suedia, Finlanda, Franca).
Në atë kohë, studenti i historisë dhe anëtar i organizatës së djathtë Andrej Bilecki, një ndër komandantët më të njohur azovas sot, vendosi të shkonte në Kosovë me një grup idealistësh, “sepse atij i dukej si një luftë e një vendi të krishterë kundër faktorit islamik”. Megjithatë, siç dëshmoi Bilecki në një intervistë, kur ai dhe miqtë e tij mblodhën të gjitha letrat dhe i çuan në ambasadën e RFJ-së, “serbët i bënë të hiqnin dorë”.
Është interesant fakti që zyrtarët ukrainas dënuan bombardimet e NATO-s, duke u përpjekur të jenë ndërmjetës në negociatat e paqes ndërmjet RFJ-së dhe NATO-s. Megjithatë, ndërmjetësues në fund ishin Marti Ahtisaari dhe diplomati rus Viktor Chernomyrdin.
Në vitin 1999, Ukraina nuk ia dorëzoi hapësirën ajrore NATO-s për të bombarduar RFJ-në, thënë ndryshe Serbinë. Pas bombardimeve, ushtarët ukrainas ishin pjesë e kontigjentit polak dhe nën komandën e ushtrisë amerikane.
Që nga fillimi i misionit të KFOR-it, batalioni ukrainas u vendos në komunën e Shtërpcës, ku shumica e popullsisë ishin serbë, dhe gjatë verës së vitit 1999 në atë komunë shkuan edhe serbët nga Prizreni e Ferizaj.
Sipas dëshmive lokale, anëtarët e KFOR-it ukrainas mbronin serbët vendas nga një sulm i supozuar i UÇK-së në verën e vitit 1999, kështu që enklava serbe ka mbijetuar deri më sot.
Bashkëpunimi jugosllavo-ukrainas vazhdoi edhe pas luftës.
Një detaj tjetër interesant është se gjeneral-lejtnant Jovan Milanoviç, një aktor në aferën e spiunazhit Binel, i cili ishte aktiv në inteligjencën në Bruksel nga fillimi i vitit 1995 deri në fund të vitit 1998, iu dha grada e nderit Gjeneral Lejtnant i Forcave të Armatosura të Ukrainës “për merita në mbrojtjen e rendit kushtetues të Ukrainës”. /tesheshi.com/
