Kryeministri Rama po rreket të shfaqet negociator për Gaza-n, që nga Tirana, duke i diktuar vetes rol në çështjen më të nxehtë të botës ku po ndodh një genocid dhe ku po luhet shahu gjeopolitik i botës.
Ai ka zhvilluar së fundi takime të ndara me ambasadorët e Ligës Arabe dhe të Izraelit në Shqipëri, duke i mëshuar pozicionit pro Izrael e jo Hamas.
“Më 7 tetor, Shqipëria qëndroi e vendosur me Izraelin kundër Hamasit. Dhe ne vijojmë ta bëjmë këtë. Izraeli ka të drejtën e padiskutueshmë për të mbrojtur veten dhe krimet e tmerrshme të Hamasit nuk mund të harrohen apo të relativizohen dhe nuk duhet të kalojnë të pandëshkuara”, tha Rama, duke artikuluar frazën standarte dhe tejet të diskutueshme të “vetëmbrojtjes izraelite” me genocid.
“Megjithatë, si një vend paqedashës me shumë besime fetare, Shqipëria është shumë e shqetësuar për konfliktin e zgjatur në Gaza. Ne jemi të shqetësuar nga shkatërrimet, viktimat civile dhe vuajtjet”, thekson ai, në një përpjekje kinse për të qenë i ekuilibruar.
Duke lënë mënjanë se ç’është Izraeli, qartaz një shtet terrori që nga krijimi i tij, Rama merret me Hamasin, duke qenë kështu kundër aleatit dhe mikut të toj Erdogan.
“Ne nuk kemi asnjë dyshim: Hamasi është një agjent i kaosit, një vegël në duart e lojtarëve djallëzorë me ambicie shumë përtej Gaza-s. Ata kërkojnë të shkatërrojnë çdo shans për pajtim dhe paqe rajonale duke minuar regjimet në Lindjen e Mesme. Ata përpiqen të antagonizojnë marrëdhëniet midis Evropës dhe Lindjes së Mesme deri në pikën e moskthimit duke shtyrë spiralen e një përplasjeje qytetërimesh. Ata kërkojnë të diskreditojnë demokracinë dhe shumë më tepër. Dhe kam frikë se zgjatja e vuajtjeve të civilëve të popullit palestinez dhe izraelit vetëm ushqen këto ambicie të liga”, arsyeton në mënyrë të çalë i pari i qeverisë shqiptare
“Më 6 nëntor, katër ditë përpara Forumit të Paqes në Paris 2023, unë paraqita idenë se një koalicion shumëkombësh i Ligës Arabe dhe Turqisë, me një mandat të OKB-së, mund të merrte përkohësisht kontrollin e Gaza-s duke lehtësuar rindërtimin e nevojshëm dhe kalimin e përgjegjësive qeverisëse nga Hamasi tek Autoriteti Palestinez”, u shpreh Rama, duke i atribuar vetes formula zgjidhjeje për atë që s’e pyet kush.
Kujtojmë se Rama po ndjek linjën perëndimore të propagandës së sforcueshme sikur historia e konfliktit izraelito-palestinez nis më 7 tetor. I duhet thënë se ka nisur me 14 maj 1848, kohë kur Hamasi nuk ekzistonte dhe kur nisi një ndër tragjeditë më të mëdha të historisë njerëzore, ajo palestineze, një kombinim i lig e mizor i aparteidit me spastrim etnik. Pra, Hamas është pasoja e jo shkaku . /tesheshi.com/
