Kur në Santiago s’bie shi!

“Në Santiago bie shi”, quhej një film i njohur i viteve 80-të, dedikuar ngjarjeve që çuan në ardhjen e Pinoçetit në pushtet. Ishte madje ky një ndër ata filma shumë të ofruar në atë kohë në kinematë shqiptare, nga e cila shqiptarët njihnin Kilin, që pak vite më vonë do e njihin nga romanet e Izabel Alendes, shkrimtarja më e famshme kiliane. Kjo është mbesa e Salvator Alendes, ish-presidentit majtist të vetëvrarë në zyrë, të cilit i është referuar Meta si model herozmi politik.

Kështu, ndërsa thatësira në vend amerikanolatin hyn në vitin e saj të 13 radhazi, autoritetet njoftuan të hënën se planifikojnë të vendosin një racionim uji në zonën metropolitane të kryeqytetit Santiago, një masë e paprecedentë kjo.

“Një qytet nuk mund të jetojë pa ujë,” tha në një konferencë shtypi Claudio Orego, guvernatori i zonës metropolitane të Santiagos. “Ne po përballemi me një histori të paprecedentë 491-vjeçare të Santiagos, ne duhet të përgatitemi për mundësinë që nuk ka ujë të mjaftueshëm për të gjithë që jetojnë këtu.”

Plani i autoriteteve parashikon krijimin e një sistemi alarmi me katër shkallë, nga jeshile në të kuqe. Në varësi të nivelit, fillimisht do t’u bëhen rekomandime qytetarëve, më pas do të ulet presioni dhe në fazën përfundimtare do të ketë furnizim me ujë me rotacion për rreth 1.7 milionë konsumatorë.

Sistemi i alarmit do të bazohet në nivelin e ujit të lumenjve Maipo dhe Mapocho, nga të cilët pompohet pjesa më e madhe e ujit që furnizon kryeqytetin. Sasia në të dy lumenjtë është ulur për shkak të thatësirës shumëvjeçare.

Autoritetet vlerësojnë se burimet ujore të shfrytëzueshme të Kilit janë tkurrur nga 10% në 37% në 30 vitet e fundit dhe mund të tkurren deri në 50% në Kilin verior dhe qendror deri në vitin 2060.

Deficiti në lumenj, i cili llogaritet në litra në sekondë, do të përcaktojë nëse furnizimi me ujë do të ndërpritet çdo 12, 6 apo 4 ditë, sipas autoriteteve.

“Kjo është hera e parë në historinë e Santiagos që një racion uji vendoset për shkak të ashpërsisë së ndryshimeve klimatike,” tha Orego.

Disa lagje në qendër do të përjashtohen nga masa, për shkak të densitetit të lartë të klientëve rezidencialë dhe të korporatave. /tesheshi.com/