Gledis Nano, kreu i Policisë së Shtetit, u është drejtuar vartësve me gjuhën e popullit, pas disa ankesave të ardhura nga populli kundrejt unoformave blu.
Në një mesazh dërguar drejtuesve të policisë në qarqe dhe drejtuesve të departamenteve, Nano shprehet i shqetësuar sidomos për diferencimin që policët shfaqin ndaj atyre që përfaqësojnë njeriun e thjeshtë dhe atë që është njeriu problematik.
“Punonjës policie që nuk njohim humanizmin fare po fare, që nuk tolerojnë (brenda ligjit) qytetarët e ndershëm por tolerojnë horrat e trafikantët”, thotë ai në mesazhin e tij.
“Përshëndetje të nderuar drejtues!
Ditët e fundit, mua si Drejtor i Përgjithshëm më kanë ardhur shumë komente të qytetarëve për punën e policisë së shtetit.
Gjithashtu kam ndjekur me vëmendje shumicën e reagimeve të qytetarëve në rrjetet sociale.
Duke anashkaluar reagimet politike, mllefin e qytetarëve e me të drejtë, kam seleksionuar vetë disa prej tyre që për mua janë shumë shqetësuese.
Qytetarët më së shumti ankohen për sjelljen e punonjësve të Policisë, më shumë për rrugoren, patrullat, shqiponjat, policinë kufitare e atë kriminale.
Punonjës policie që sillen arrogantë me qytetarët, që nuk zbatojnë ligjin por shikojnë interesin e xhepit të tyre duke abuzuar rëndë me detyrën dhe rrjedhimisht do kemi këtë perceptim qytetar.
Punonjës policie që nuk njohim humanizmin fare po fare, që nuk tolerojnë (brenda ligjit) qytetarët e ndershëm por tolerojnë horrat e trafikantët.
Shumë denoncime në rrjete sociale edhe për Policinë Kufitare, për marrje ryshfeti nga mjetet lundruese dhe për pasojë ndodhemi në këtë situatë sot.
Sjellje arrogante nga Patrullat e Përgjithshme dhe Shqiponjat, në shumicën e raste vetëm e vetëm për të bërë presion e për të marrë ryshfet.
Mesazhe të ngjashme me dhjetëra qindra kanë ardhur e vijojnë të vijnë. Kjo është shumë shqetësuese shumë alarmante.
Një mesazh që s’duhet të bjerë në vesh të shurdhër:
‘Sigurisht një pjese e mirë e policëve të vjetër duhen hequr fare se janë të korruptuar, ama me këta të rinjtë punoni me edukimin e tyre. Kanë problemë te pafundme me komunikimin me qytetarët, inferiorë në komunikimin edukativo-njerëzor’.
Shumë i dhimbshëm për Policinë ky mesazh.
‘Mjafton të kesh një dokument policie e bën ç’të duash në këtë vend’.
Zgjodha disa prej tyre që më janë drejtuar mua si Drejtor i Përgjithshëm.
Të merrem masa të menjëhershme nga Departamentet përkatëse e mos raportoni pa i lexuar ‘dakord, dakord’. Por të reflektoni urgjent përballë këtij realiteti të skanuar nga syri qytetar”, përfundon mesazhin e tij Kryepolici shqiptar.
Ky zhvillim vjen në një moment të vështirë për Policinë e Shtetit, ku ngjarja e Himarës, ku nëj efektiv i morri jetën një vajze 7-vjeçe duke bërë qejf me gomone, ishte kupëmbushja e një degradimi të ligjzbatuesve me uniformë. /tesheshi.com/
