Sikurse për paraqitjet e tij të pashoqe në ring, shkruan Independent, Aliu u bë i njohur si një prej mendjeve dhe gjuhëve më të mprehta, diçka që qartas nuk u zvogëlua me kalimin e viteve, përkundër betejës me sëmundjen e parkinsonit.
Në fund të vitit të kaluar, ndërsa biznesmeni Donald Tramp spikati në garën presidenciale, me gjithë islamofobinë që solli, muslimani më i famshëm i Amerikës ia theu hundët me një deklaratë 132-fjalëshe.
Pasi Trampi deklaroi planin e tij për t’ua ndaluar hyrjen në SHBA të gjithë muslimanëve, Ali e dënoi nismën dhe llafazanin amerikan pa e përmendur emrin e tij:
“Unë jam një musliman, dhe nuk ka asgjë islame në vrasjen e njerëzve të pafajshëm në Paris, San Bernardino, apo kudo tjetër në botë. Muslimanët e vërtetë e dinë se dhuna e pamëshirshme e të ashtuquajturve xhihadistë islamikë është në kundërshtim të plotë pikërisht me parimet e fesë sonë.
‘Si muslimanë, duhet të çohemi kundër atyre që e përdorin Islamin për të çuar përpara axhendën e tyre personale. Ata kanë larguar shumë njerëz nga të mësuarit mbi Islamin. Muslimanët e vërtetë e dinë, ose duhet ta dinë, se është kundër fesë sonë që t’ia imponosh dikujt Islamin.
Duke folur si dikush që nuk është akuzuar kurrë për mungesë të korrektesës politike, unë besoj që udhëheqësit tanë politikë duhet ta shfrytëzojnë pozitën e tyre për të sjellë mirëkuptim mbi fenë islame, e të sqarojnë se këta vrasës të shpërudhur i kanë shtrembëruar pikëpamjet e njerëzve mbi atë se çfarë është vërtet Islami.” /tesheshi.com/
