Nga Blendi Gashi
Barazimi i Kosovës me Finlandën në kuadër të eliminatoreve të “Rusia 2016”, e para përballje si shtet i pavarur në një lojë e për një kompeticion serioz, u shoqërua si shije e ëmbël dhe nga ajo e hidhura e shtyerjes së liberalizimit të vizave pasi u vendosën dy kushte: një konkrete siç është ratifikimi i Demarkacionit; si dhe një më tepër vizionare, lufta kundër korrupsionit dhe krimit të organizuar.
Dhe, duke pasur parasysh kriteret e mbetura, sidomos luftën antikorrupsion, mund të konkludohet se kosovarët as këtë vit nuk do të kenë mundësi të udhëtojnë pa viza.
Kështu, edhe një herë dëshmohet se qytetarët u mashtruan, gjë që po ndodh në vazhdimësi që nga viti 2010, së pari nga qeveria “Thaçi”, e më pas edhe nga qeveria “Mustafa”. E megjithatë, askujt prej tyre nuk iu skuqet faqja e të japë dorëheqjen.
Politikani që më së shumti ka proklamuar heqjen e vizave, është padyshim ministri i Integrimeve Evropiane, Bekim Çollaku.
Ky i fundit në vazhdimësi që nga viti 2015-të ka deklaruar se liberalizimi do të ndodh këtë vit, më së largu në muajin shtator.
Por, ndërsa ky premtim i Çollakut po del të jetë bosh, ai në vend se të japë dorëheqje nga pozita e ministrit, këto ditë duke u lavdëruar deklaroi se misioni i tij në krye të Ministrisë së Intergrimeve është përmbyllur dhe se do të kalojë në pozitën e këshilltar të presidentit Thaçi.
Por, për çfarë misioni të përmbyllur e ka fjalën Çollaku?! Liberalizimi i vizave nuk ka ndodhur. Por ai sigurisht se po rehatohet në një pozitë tjetër para se t’i kërkohet dorëheqja nga pozita e ministrit që mban ende, për shkak të mosmbajtjes së premtimit për heqjen e vizave.
Vizat, pas zgjedhjeve të reja parlamentare
Opozita dhe analistët në Kosovë thonë se liberalizimi i vizave pa të drejtë për Kosovën do të shtyhen për vitin tjetër, apo deri pas zgjedhjeve të ardhshme parlamentare.
Avni Arifi, nga Aleanca për Ardhmërinë e Kosovës (AAK) thotë se debati se a ka viza apo jo sivjet është debat i mbajtjes gjallë të mashtrimit kolektiv nga ana e qeverisë.
Arifi thotë se ish kryeministri Thaçi e ka mashtruar Kosovën që nga viti 2010, dhe mashtrimin po e vazhdon edhe kryeministri aktual Isa Mustafa.
“Nuk ka viza. Debati se a ka viza sivjet është debat i mbajtjes gjallë të mashtrimit kolektiv nga ana e qeverisë. Më vjen keq për gjuhën por Thaçi e ka mashtruar Kosovën që nga viti 2010 kur thoshte se ka marrë ‘garanca nga nivelet më të larta të BE se BE s’do të vonohet’. Kryeministri aktual me logjikën e njëjtë si Thaçi mashtroi në dhjetor të 2014 kur tha se do të ndodhë liberalizimi më 2015 kurse gjatë tërë vitit 2015 mashtroi për 2016-ën. E në 2016 e gjeti shpëtimin te votimi për demarkacion. Kjo logjikë është shprehje e mosrespektit minimal që kanë për aytetarin e vendit dhe asgjë tjetër.Është e qartë që BE nuk don të jap asgjë që do të mund të shihej si ‘shpërblim’ për këtë qeveri koti por shtyrja e liberalizimit të vizave deri pas zgjedhjeve të ardhshme nacionale është e padrejtë e madhe që i bëhet popullit të Kosovës”, thotë Arifi, për tesheshi.com.
Njohësi i rrethanave politike në vend, Arsim Haziri, konsideron se çështja e liberalizimit të vizave është konsumuar prej faktorit politik dhe ky proces nuk pritet të ndodh brenda këtij viti, për shkak të çalimit të kryerjes së obligimeve.
“Bashkimi Europain nuk pretendon të ketë një shtet përbrenda zonës së saj, ku shteti në fjalë akoma vuan nga mungesa e theksuar e konsolidimit të elementeve shtetërore.
Prandaj, çështja e vizave gjykoj se mund të jetë një proces i arritshëm vitin e ardhshëm por vetëm nëse përfundojnë pozitivisht kërkesat që janë përcaktuar, e konkretisht, luftimi i korrupsionit. Aktualisht për këtë çështje çdo pretendim ka vdekur dhe në këtë frymë mendoj se liberalizimi nuk mun të ndodh këtë vit”, thotë analisti Haziri, për tesheshi.com. /tesheshi.com/
