Nga Mensur Krasniqi
“Do gjenden njerëz të mirë kudo…”, është kjo një lloj sentence sempliste që gjen shprehje dhe këto ditë në realitetin maqedonas, ku ethet nacionaliste janë aktivizuar si pasojë e zhvillimeve politike. Më konkretisht, për dallim nga proklamimi të politikave nacionaliste me theks antishqiptar të partisë në pushtet, VMRO-së dhe presidentit të shtetit, Gjorgje Ivanov, ka nga ato akademikë maqedonas të cilët distancohen prej kësaj qasjeje në raportet multietnike. Njëri ndër to është profesori universitar, Temellko Ristevski. Sipas tij shqiptarët janë qytetarë të njëjtë si maqedonasit në këtë shtet, dhe janë në të drejtën e tyre që të kërkojnë më shumë të drejta.
Ai madje në një emision televiziv theksoi se me pranimin e Platformës së partive politike shqiptare nuk kanoset uniteti i Republikës së Maqedonisë, pasi sipas tij ajo platformë mund të realizohet në suaza të kushtetutës aktuale.
“Duke u nisur nga ajo që të gjithë qytetarët janë bartës të sovranitetit, maqedonas e shqiptarë bashkë, si dhe të etnive tjera, duhet të kihen parasysh edhe kërkesat e tyre”, tha profesor Ristevski.
Nga ana tjetër, disa zëra opinionistikë shqiptarë, vijojnë të komentojnë aktin e Ivanovit për të mos i dhënë mandatin Zaevit.
Sipas Bashkim Bakiut, kjo nuk përbën habi.
“Duke marë parasysh qëndrimet e tij me parë, ishte e pritshme se ai do veproj si anëtarë i VMRO-DPMNE-së. Kjo le të jetë mësim për gjithë liderët dhe gjithë intelektualët shqiptarë se kjo qasje është ofenduese ndaj shqiptarëve. Populli shqiptarë nuk llogaritet si sovran, aq më keq intepretohen si popull i rrezikshëm për shtetin. Qasja e shqiptarëve nga sot e tutje duhet të ndryshoj ndaj shtetit. Kur jemi te sovraniteti që buron nga populli, në këtë rast parlamenti duhet të thirret nga deputeti më i vjetër dhe nga kuvendi të zgjidhet kryetari i parlamentit, dhe ndërkohë të zgjidhet qeveria e re”, tha Bakiu për tesheshi.com.
Nga ana tjetër, kreu i organizatës jo-qeveritare “Eco Guerila”, Arianit Xhaferi vlerëson se cilido politikan shqiptarë që pranon negociata me VMRO-në dhe pranon Ivanovin si president, do shpallet armik i popullit të vet.
“Gjorge Ivanov do me çdo kusht qeveri të VMRO-së. Partitë shqiptare duhet ta bojktojnë VMRO-në, me çdo kusht! Sidomos pas protestave fashiste antishqiptare të ditëve të fundit, si dhe pas asaj fushate fashiste që VMRO pati para zgjedhjeve. Cilido politikan shqiptar që do bisedojë tash e tutje me VMRO-në apo me Ivanovin, do jetë armik i popullit të vet! Vdekje fashizmit!”, kështu ka shkruar në rrjetin social facebook, Arianit Xhaferi.
Megjithatë lideri i LSDM-së, Zoran Zaev ende shpreson se Ivanov do të pendohet për vendimin e marrë para dy ditësh, dhe do t’ia jep atij mandatin, ndryshe qeveria mund të formohet edhe në mënyra tjera.
“Ai do ta japë mandatin, ashtu është rendi. E vetmja mënyrë më e drejtë është kjo. Në fund do t’ma japë mandatin. Ka edhe mënyra tjera për të formuar qeverinë, por e rendit është që Ivanov të pendohet dhe t’ma japë mandatin”, tha Zoran Zaev në emisionin e mbrëmshëm të televizionit maqedonas, tvNOVA. /tesheshi.com/
