Gjatë gjithë fushatës së Donald Trump dhe Kamala Harris përpara zgjedhjeve të 5 nëntorit, votuesit amerikanë janë bombarduar me foto të dy politikanëve duke mbajtur fjalime, duke përshëndetur turmat në mitingje dhe duke pozuar me të famshëm që mbështesin kandidaturën e tyre.
Megjithatë, dy fotot e mëposhtme ofrojnë një këndvështrim tjetër se kush janë dy kandidatët për president të SHBA-së dhe nga kanë nisur.
Në këto foto, ne shohim zv/presidenten e Bidenit (majtas) dhe ish-presidentin e SHBA (djathtas) si fëmijë, vite përpara se të lindte në mendjet e tyre ideja për t’u angazhuar në politikë.
Dy kundërshtarët në zgjedhjet e pritshme kanë një diferencë të madhe moshe, pasi Harris është 60 vjeçe dhe Trump 78.
Kandidatja presidenciale demokrate i kaloi vitet e para në Oakland, Kaliforni, ndërsa kandidati republikane u rrit në Queens, New York.
Harris (majtas në foton më poshtë) dhe motra e saj Maya (vajza e vogël pranë saj) u rritën kryesisht nga nëna e tyre, Shyamala Gopalan Harris, një studiuese indiane e kancerit dhe aktiviste sociale.
Babai i Trump, Fred Trump, ishte djali i emigrantëve gjermanë dhe nëna e tij, Mary Ann McLeod Trump, lindi në Skoci. Në moshën 13-vjeçare, prindërit e tij e regjistruan atë në Akademinë Ushtarake të New York-ut.
Harris ndoqi shkollën e mesme në Montreal, Kanada, ku u shpërngulën kur nëna e saj u punësua si profesore në Universitetin McGill. Më pas ajo u regjistrua në Kolegjin Howard në Uashington, D.C., një institucion historik arsimor afrikano-amerikan.
Trump ka thënë se qëndrimi i tij pesëvjeçar në akademi, i cili filloi në vitin 1959, i dha atij trajnim ushtarak dhe forcoi aftësitë e tij drejtuese. Ai më vonë nuk luftoi në Vietnam pasi siguroi katër shtyrje për arsye akademike dhe një për një gjendje kockore.
Që në moshë të re, Harris mësoi nga nëna e saj për rëndësinë e lëvizjes për të drejtat civile dhe në vitin 2004 ajo mori pjesë në marshimin vjetor të lirisë “Martin Luther King Jr” në Uashington.
Pas diplomimit në Shkollën Wharton të Universitetit të Pensilvanisë, Trump filloi të përgatitej për të pasuar të atin në krye të biznesit familjar.
Harris u kthye në Kaliforni pas studimeve të saj, ku shpejt u ngjit në krye të sistemit të drejtësisë penale të shtetit – ajo u emërua prokurore e përgjithshme – dhe e përdori atë moment për të siguruar zgjedhjen e saj në Senatin e SHBA në 2016.
Në të njëjtin vit që Harris hyri në Kongres, Trump hyri për herë të parë në Shtëpinë e Bardhë, duke befasuar botën me fitoren e tij ndaj Hillary Clinton.
Tre vjet më vonë, pas një fushate “të dobët” për nominimin demokrat, Harris u zgjodh nga fituesi i garës, Joe Biden, si kandidat për zëvendëspresident. Aleanca e tyre elektorale doli të ishte fituese, pasi të dy mundën Trump dhe Mike Pence. /tesheshi.com/
