Një dukuri e re është vënë re këto ditë ndërsa partitë kryesore po vendosin për emrat e kandidatëve për kryetarët e 61 bashkive të vendit, sipas ndarjes së re territoriale. Vonesa e emrave që do të garojnë në këto njësi administrative, mësohet se ka një shkak: rebelimin e ish-komunarëve.
Një pjesë e emrave “të fortë” që kanë drejtuar njësitë e mëdha rurale, që i kanë kthyer në domene lokale, po bëjnë rezistencë, ndoshta jo thjesht për të kandiduar, por për të bërë një pakt me shefat e mëdhenj për qëndrimin e tyre në politikën aktive. Në fakt, këtë situatë e ka ndihmuar edhe vetë ndarja e re administrative, e cila vërtetë ka krijuar një konfigurim të ri bashkish, shumica prej tyre më shumë se zona qytetare, mbeten realisht njësi rurale.
Por në këtë “grackë” kanë rënë edhe bashkitë që si qendra administrative kanë qytete të mëdha: Tirana, Shkodra, Durrësi, Elbasani etj., ndërkohë që Fieri dhe Vlora janë më shumë të imunizuara si pasojë e prezencës të disa bashkive paralele që i heqin barrën rurale, si Patosi, Roskoveci, Selenica, Himara etj.
Shenjë e këtij konfigurimi është edhe kandidimi si kryetar i Bashkisë së Pogradecit nga e majta, e një ish-kryetari komune siç është Roshi Tolloshina, i cili ka drejtuar komunën Buçimas. Por situata nuk është rozë edhe në zona të tjera. Në takimin që kryeministri Edi Rama ka zhvilluar javën e kaluar me struktura të PS-së në Shkodër, ka hasur klimën e një “rezistence” nga ana e drejtuesve të komunave që Partia Socialiste i ka fituar në Shkodër edhe në ditën më të keqe të saj.
Rama ka tentuar një sheshim të mosmarrëveshjeve, jo thjesht se ata kanë qenë përkrahës të deputetit të përjashtuar Tom Doshi, por edhe për faktin se krerët e këtyre komunave kanë krijuar një “aleancë” për t`i bërë të ditur PS-së se nuk është faktor vetëm qyteti i Shkodrës, por edhe tërësia e fshatrave që e rrethojnë atë.
Realisht, numri i votuesve është gati i njëjtë, gjë që i jep rëndësi specifike dhe peshë potenciale.
E njëjta gjë po ndodh jo vetëm me mazhorancën por edhe me opozitën. Në bashkinë e Durrësit e cila rrethohet nga dy zona të fuqishme ish-komuna me potenciale turistike si Golemi dhe Rashbulli, së bashku me ish-kënetën, bëjnë një fuqi numerike që vendos realisht për fatin e bashkisë së madhe.
Deputeti i Partisë Demokratike, Dashamir Shehi, ka qenë i pari që ka ngritur këtë problem prej kohësh. Zoti Shehi ka propozuar se disa zona që dominohen nga zona rurale, nuk kishin pse bëheshin bashki, duke qenë se më i rëndësishëm është profili bujqësor dhe blektoral dhe jo ai urban.
Testi real janë zgjedhjet e 21 qershorit, i cili përveçse do të nxjerrë administratorët e hartës së re territorial, është një test i balancës mes zonave urbane dhe rurale në këtë ndarje. Dhe kjo balancë do të përcaktojë peshën specifike të lobimeve apo grupimeve të reja që do të krijohen.
Përgatiti Ylli Pata – /tesheshi.com/
