Udhëheqësi i Organizatës Botërore të Shëndetësisë (OBSH) i bëri thirrje botës që të bashkohet dhe të marrë vendimet e vështira të nevojshme për t’i dhënë fund pandemisë COVID-19 vitin e ardhshëm.
“Viti 2022 duhet të jetë viti i fundit të pandemisë”, u tha gazetarëve në Gjenevë, Tedros Adhan Ghebreyesus, Drejtori i Përgjithshëm i OBSH-së.
Me afrimin e festimeve të Vitit të Ri, kreu i Agjencisë së Shëndetit Publik të Kombeve të Bashkuara pranoi se “ne të gjithë duam ta kalojmë atë kohë me miqtë dhe familjen. Të gjithë duam t’i rikthehemi jetës normale”.
Ai tha, megjithatë, se nëse duam të kthehemi në normalitet, duhet të mbrohemi tani që numri i të infektuarve, i shkaktuar nga varianti shumë ngjitës Omicron i koronavirusit, ka shpërthyer.
Që kur u regjistrua për herë të parë në Afrikën e Jugut në nëntor, Omicron është konfirmuar në dhjetëra vende, duke shuar shpresat se më e keqja e pandemisë ka kaluar. /tesheshi.com/
