Tifozeria boshnjake ka lënë një shije të hidhur në Tiranë, ku edhe pse ekipi i tyre Zrinjski Mostar fitoi ndaj ekipit kryeqytetas në takimin e parë për Conference League, ata shfaqën një tërbim që çoi në incidente dhe kaos rreth “Air Albania”-s e më tutje, deri në sheshin “Skënderbej”.
Veç përplasjes me tifozerinë shqiptare, raportohet madje se ata ngacmuan dhe vajza, deri në ekstremin tjetër më pas, atë të përplasjes me policinë.
Kjo e fundit lëshoi një deklaratë nga gjithë ajo çfarë ndodhi, duke dhënë detaje:
“Më datë 19.07.2022, në stadiumin Air Albania, pas përfundimit të ndeshjes Tirana-HSK Zrinjeski Mostar i Bosnje Hercegovinës, gjatë daljes së tifozëve, shërbimet e Policisë kanë ndërhyrë për të shoqëruar disa tifozë të ekipit të Bosnje Hercegovinës, të cilët gjatë zhvillimit të ndeshjes kanë kanë hedhur sende të forta dhe lëndë piroteknike.
Gjatë momentit të shoqërimit të tyre, pjesa tjetër e tifozëve të këtij ekipi, ka kundështruar me forcë dhe me sende të forta punonjësit e Policisë, për të mos lejuar shoqërimin e tyre.
Shërbimet e Policisë, për të neutralizuar aktet e dhunshme të tifozëve, kanë përdorur gaz lotsjellës për t’i shpërndarë ata.
Si pasojë e akteve të dhunës nga ana e tifozëve, është dëmtuar një punonjës Policie si dhe një tifoz, të cilët ndodhen në spital, nën kujdesin e mjekëve, jashtë rrezikut për jetën.
Nga shërbimet e Policisë deri tani janë shoqëruar 25 tifozë.
Sqarojmë opinionin publik që nuk ka pasur të shtëna me armë dhe vijon puna për shoqërimin e personave të tjerë të përfshirë në akte të dhunshme ndaj punonjësve të Policisë.
Grupi hetimor nën drejtimin e Prokurorisë vijon punën për dokumentimin e plotë të rrethanave të ngjarjes”.
Ky zhvillim në Tiranë vjen pas atij të finales së Europe League, pak javë më parë, ku tifozeritë e ekipeve finaliste, Romës dhe Feyenord-it, sidomos holandezët, “lanë nam” me sjelljet e tyre huliganeske.
Siç duket, ashtu si derrat, edhe tifozeritë një turi paskan, kudo. /tesheshi.com/
