Nga Ylli Pata
Në shtet kanë nisur ethet e testimit të nëpunësve shtetërorë: mësues, mjekë, infermierë, psokologë tij. Por absurdi në fakt është se Ministria e Mirëqenies Sociale ka testuar edhe sanitaret! Po po, pastrueset që kanë si mjete pune fshesën, shtupën dhe detergjentët.
Sofie Pano, është 60 vjeçe dhe është pastruese në Azilin e të Moshuarve në qytetin e Shkodrës. Ajo është në prag të pensionit, por është thirrur të premten për të dhënë një provim me shkrim që është zhvilluar në Universitetin Mesdhetar të Tiranës (universitet privat!).
Sofia ishte shumë e stresuar pasi kurrë nuk ka dhënë provim, ajo ka qenë e rregullt jo thjesht në pastërti e sistemim por edhe në marrëdhënien me të moshuarit.
“Na kanë ba me fol me vedi”, thotë Sofia, e cila nuk e kupton ende sesi mund të japë provim një sanitare, duke pasur parasysh se ajo nuk ka lëvizur gjithë këto vite pavarësisht se kanë ndryshuar qeveritë.
Testi i zhvilluar për këta punonjës, kishte 50 pyetje, disa formuese, por disa edhe me zhvillim, pra të japim një koment apo koncept mbi çështjen. Por kjo ishte edhe pjesa e parë, sepse ka edhe një seancë tjetër që është provimi me gojë që do të zhvillohet një ditë tjetër “të përshtatshme” sipas Ministrisë së Mirëqenies Sociale dhe Rinisë.
Realisht, këto provime kanë një precedent që janë kohët e largëta të të ashtuquajturat “Forma të Edukimit” ku punonjësit mësonin konceptet bazike të komunizmit, por padyshim në fjali të thjeshta dhe nuk jepej provim. Shumë nga pjesëmarrësit në provimin e MMR nuk pranojnë të flasin por janë të terrorizuar se provimi është thjesht një shkak për t’i hequr nga puna…/tesheshi.com/
