Pakkush mund ta dijë, por lojtarët më të mirë të botës sot, mund të kishin luajtur në Itali më parë. E ka “kafshuar” keqaz gjuhën sot, presidenti i skuadrës së Komos në vitin 2002, Enriko Preciozi, kur zbuluesi i talenteve i kërkoi të blinte për 50 mijë euro, një fenomen 14-vjecar që quhej Lionel Mesi. Por Preciozi nuk vendosi ta blejë, për shkak të fizikut të mëngjërashit. Natyrisht, sot këtë vendim, e quan gabim të madh. E ta mendosh, Leo Mesi lojtar i Komos!
Edhe Kristiano Ronaldo për pak do të ishte lojtar i Parmës. Arrigo Saki që në vitin 2003 ishte drejtor teknik i Parmës, ka zbuluar se kanë synuar ta blejnë Ronaldon adoleshent për 11 milion euro, nga Sportingu i Lisbonës. Por marrëveshja nuk u mbyll, për shkak të një “dreq” miqësoreje që Sportingu luajit kundër Mancester United. Në atë ndeshje, sytë e “ujkut të vjetër” Ferguson ndritën fort kur pa sulmuesin 17-vjecar, e në fund të ndeshjes i tha se ai do të luante në Mancester sezonin tjetër. Dhe kjo ndodhi.
Modestët e Kievos gjithashtu mund të kishin Didier Drogba në sulmin tyre. 500 mijë euro ishte marrëveshja e vendosur “në parim” për Drogba-në, por Lazio nuk e bleu sulmuesin Eriberto, që lironte vendin në sulm. Për këtë shkak, tratativa dështoi. Ndërsa Drogba u bë i madh tek Chelsea.
Edhe klasin e Ronaldinjos, italianët mund ta kishin evidentuar të parët, që kur ishte fëmijë. Në vitin 1988, Ronaldinjo bën një provë me skuadrën e fëmijëve të Torinos, por me sa duket, nuk i bindi trajnerët. Madje siç ka rrëfyer vetë Dinjo, e gjithë familja mezi priste të zhvendosej në Itali atë kohë. Por për ta frenuar marrëveshjen dhe “mërzitur” italianët, rol ka luajtur edhe ndërhyrja e Gremios, e cila e mori menjëherë në përbërje të saj të voglin që u bë ndër më të mëdhenjtë. /tesheshi.com/
