Nga Blendi Gashi
Saktësisht edhe dy javë kanë afat deputetët serbë të Kosovës të kthehen në Kuvend, në të kundërtën disa prej tyre do t’i humbin mandatet.
Ndonëse kthimin e tyre e kanë kushtëzuar në vazhdimësi me krijimin e Asociacionit të komunave me shumicë serbe apo siç njihet ndryshe “Zajednica”, ata shumë shpejt do detyrohen të kthehen në ulëset e institucionit ligjvënës, sigurisht jo për të punuar për të mirën e qytetarëve që ua kanë dhënë votën, por për xhepin e tyre, pra për pagat, pasi nëse nuk kthehen deri më 7 prill, disa prej deputetëve të këtij komunuiteti i skadon mandati.
Të vetëdijshëm se mund të mbesin pa pagën shtetërore dhe benificionet përcjellëse, disa deputet serbë raportohet se tashmë në Kuvend kanë shkuar për t’u regjistruar.
Një vendim të tillë pritet ta marrë së shpejti edhe deputeti Nenad Rashiq i cili ka thënë se veprimi në fjalë është akt shpëtimi dhe se këtë gjë është i detyruar ta bëjë edhe vetë.
Por a është ky kthim i serbëve në institucione dinjitoz?
Deputeti Rashiq e pranon se jo. “Nuk ka kthim dinjitoz. Minimumi që ne duhet të fitojmë është iniciativa për formimin e statutit ose të Ekipit drejtues të Asociacionit të Komunave me shumicë serbe. Ky është minimumi. Nëse edhe më tej heshtet për formimin e Asociacionit të Komunave serbe, nuk ka kurrfarë shansi që të kthehemi në institucione, sepse nuk kemi ç’të themi”. citon radiokim të ketë thënë Rashiq.
Pra, nga deklarata e Rashiq mund të kuptohet se deputetët serbë do rikthehen në Kuvend vetëm sa për të mos e humbur mandatin, ndërsa paralajmërohet vazhdimi i bojkotit të sërish të institucioneve nëse nuk u plotësohet kërkesa bazë e tyre që është themelimi i “Zajednicës”, por në formën si ata duan.
Për të vërtetuar një gjë të tillë duhet pritur edhe dy javë deri më datë 7 prill për të parë saktësisht se si do veprojnë më tutje deputetët serbë.
Kujtojmë se Lista Serbe në fillimi të muajit tetor të vitit të kaluar bojkotojë punën e Kuvendit në shenjë protestë ndaj miratimit të Ligjit për Trepçën. Kështu, janë bërë më shumë se 5 muaj nga ajo kohë. Kurse në bazë të Kushtetutës së Kosovës dhe Rregullores së Punës së Kuvendit, mandati i deputetit përfundon në rast se ai mungon 6 muaj rresht në seancat e Kuvendit.
Ja cilët deputet serbë i kanë mbetur besnik bojkotit e cilët jo:
Që nga data 07.10.2016 nuk kanë marrë pjesë: Adem Hoxha, Nenad Rasiç dhe Srdan Popoviç
Që nga data 22-23 dhjetor 2016 nuk kanë marrë pjesë: Slavko Simiç, Slobodan Petroviç, Millena Miliçevië, Milka Vultetiç, Bojan Mitië
Ndërsa, bojkotin e kanë thyer: Jasmina Zhivkoviç, Jellena Bontiç, Sasa Milosavlevië të cilët kanë marrë pjesë në seancën e 2 marsit
Ja ç’thotë Kushtetuta për mandatin e deputetit:
Në neni 70 të Kushtetutës së Kosovës thuhet se mandati i deputetit mbaron ose bëhet i pavlefshëm, nëse: “mungon gjashtë (6) muaj rresht në seancat e Kuvendit”.
Kurse, në nenin 25 të Rregullores së Punës së Kuvendit sqarohet se Deputeti i Kuvendit e humb mandatin nëse: “në periudhën gjashtëmujore nuk merr pjesë në asnjë mbledhje të Kuvendit. Nëse deputeti nuk ia dëshmon faktet bindëse për çështjen Kryetarit të Kuvendit, Kryetari e kërkon rekomandimin e Komisionit për Mandat, Imunitet dhe Rregullore. Pas rekomandimit të Komisionit Kryetari ia propozon Kuvendit pushimin e funksionit të deputetit. Kuvendi vendos për çështjen në mbledhje të radhës”. /tesheshi.com/
