Nga Blendi Gashi
Edhe Kuvendi i Kosovës është përfshirë së fundi nga një debat që ka në qendër armët, armatosjen. Deri më tani është folur vetëm për gaz lotszjellës, por një deklaratë e paradisaditëve e kryekuvendarit Veseli, bëri që dhe aty “të krisë pushka”.
Më 19 prill, gjatë një intervistë dhënë për mediat kosovare, Veseli përligji futjen e policisë në sale – për të cilën ishte përbetuar se nuk do ndodhte – duke dhënë një lajm sa shqetësues aq edhe skandaloz, gjithmonë nëse është i vërtetë. Ai tha ka pasur informacione që brenda Kuvendit kishte deputetë si të pozitës ashtu edhe të opozitës që bartnin armë zjarri me vete.
“Nuk kam lejuar intervenimin e Policisë së Kosovës deri në atë moment kur e kam marrë vesh se kanë filluar me hy edhe me armë zjarri. Nuk po flas vetëm për njërën palë. Ka pasur deputetët nga pozita dhe opozita që kanë pasur armë në séance. Çka ju ka deshtë ajo allti?!”, ka thënë Veseli, i cili nuk ka pranuar të përmendë emra konkretë deputetësh të armatosur, sipas tij. Por kjo më pas ka shkaktuar reagime, duke u bërë çështje dite në politikën kosovare.
Opozitarët: Deklarata e kryeparlamentarit Veseli e papërgjegjeshme dhe joserioze
Deputetët opozitarë e quajnë të pamatur deklaratën e kryekuvendarit Veseli duke thënë se nuk ka pasur asnjë mundësi që persona të hyjnë brenda Kuvendit, pasi ka pasur kontrolle të rrepta nga sigurimi dhe policia. Por, ata thonë se me deklaratat e kryeparlamentarit duhet të merret prokuroria.
Deputeti i Vetëvendosje-s, Ismajl Kurteshi, deklaratën e Veselit e quan të pabazuar dhe pa argumente, dhe jo serioze.
“Ai (Veseli) ose duhet të ketë fakte dhe të argumentoi një gjë të tillë ose duhet së paku të jep përgjegjësi morale që është dorëheqja nga posti që e mban. Përndryshe ka qenë detyrë e tij që nëse ka pasur informata që në Kuvend ka pasur deputetë të armatosur ai ësht dasht t’i identifikojë dhe çarmatos.
Kjo është nje deklaratë krejt e papërgjegjshme siç është i papërgjegjshëm i tërë pushteti në Kosovë, duke përfshirë këtu edhe kryetarin e Kuvendit”, thotë Kurteshi, për tesheshi.com.
Deputeti i VV-së thotë se prokuroria duhet të merret me deklaratat e bëra nga Veseli, por ai nuk beson se do të ndodh një gjë e tillë, pasi pohon se gjykatat dhe prokuroritë dhe gjykatat janë ta kapura nga pushteti aktual.
Deputeti opozitar, Zafir Berisha, deklaratën e Veselit e sheh në vazhdën e propagandës për ta arsyetuar dhunën, siç thotë, të regjimit që është përdor ndaj deputetëve.
Berisha e quan tejet të pasinqertë deklarimin e kryekuvendaerit për futjen e armëve në Kuvend, pasi shton se edhe opinioni është në dijeni se ka pasur një kontroll të rreptë sa që nuk u janë lejuar as shkrepsat e duhanit t’i marrin me vete. “Kuvendi ka qenë nën masa aq të rrepta sigurie sa që vetëm grushtat që nuk i kemi lënë në shtëpi sepse janë pjesë e trupit. Nëse Veseli posedon infarmata se deputetë me armë zjarri të pautorizuar kanë hyrë në sallë të Kuvendit atëherë është përgjegjës për fshehjen e këtij rreziku publik dhe për fshehjen e këtyre informatave, kështu që duhet të merret Prokuroria e shtetit”, ka thënë Berisha për tesheshi.com. /tesheshi.com/
