Kishin kaluar pak ditë nga 21 janari. Një javë. Tirana ishte mbushur me media të huaja, të cilat ngaqë nuk ndodhën ditën e vrasjes erdhën për të filmuar “serinë e dytë” të revoltës shqiptare që nëpër disa gazeta italiane cilësohej si homologe e “Pranverës arabe”.
Edi Rama kishte paralajmëruar homazhe tek vend i protestës. Berisha i ishte përgjigjur se do të bëntë anti-miting me përkrahësit e PD-së, po në shesh. Ndërhyri ambasadori i sapoemëruar i SHBA-së, Alexandër Arvizu, që, i tronditur i kërkon Ramës dhe Berishës që të ndërprisnin planifikimet për të tensionuar situatën. Berisha pranon menjëherë, kurse Edi Rama jo; duke patur madje dhe një tension verbal këtij të fundit dhe kryediplomatit amerikan në Tiranë.
Në atë kohë, Arvizu shkon në zyrën e kryeministrit të atëhershëm dhe e quan “burrë shteti”, pikërisht për anulimin e anti-mitingut.
Në opinionin publik shpërthen zemërimi i opozitës dhe i disa zërave mediatikë afër saj. I ndjeri Andrea Stefani i kushtoi në dy javë rresht mbi 5 shkrime këtij cilësimi diplomatik për Berishën, i ndodhur pa u tharë ende gjaku i të vrarëve në bulevard.
Për të zgjidhur krizën vjen në atë kohë në Tiranë një zyrtar i lartë i Departamentit të Shtetit, Thomas Countryman.
Ai takoi në Tiranë edhe intelektualë të paangazhuar, që ishin mjaft të çuditur nga deklarata e Arvizusë për cilësimin “burrë shteti” të Berishës.
Përgjigja që dha Countryman ishte e çuditshme: “duam t’i heqim Berishës nga dora disa bomba të rrezikshme ose t’i çativizojmë ato!”
Po kush ishin këta bomba?
Në gazetën Tema, Mero Baze, citonte Solol Olldashi ish-ministrin e ndjerë të PD-së se i ka folur një një njeri të ambasadës ruse që u implikua me hartimin e skenarit të “puçit” më 21 janar.
Pra bëhet fjalë për një “bombë” ruse në duart e Berishës.
Por mundet që mos jetë kjo. Shikuar në distancë, bomba mund të ketë qenë ndoshta dhe vetë anti-mitingu; dhe diplomatikisht cilësimi “burrë shteti” mund të qe një dhuratë për Berishën në këmbim të tërheqjes nga përballja e palëve në shesh. Pra, me një “burrë shteti” është arritur të shmanget një gjakderdhje më e madhe se ajo e 21 janarit, që mund të shkaktohej dhe nga një përplasje civile.
Por kohë më vonë, po Arvizu do cilësonte Bashën “yll në ngjitje”, dhe kjo jo në ndonjë situatë specifike si me Berishën. Ky po që mbetet mister i madh. /tesheshi.com/
