Kriza që ka përfshirë PD-në pas humbjes më 25 prill, ka kulmuar së fundi me përplasje mes ish-presidentit Nishani e kreuit demokrat Basha.
Edhe pse ky i fundit e ka “përkedhelur” Nishanin me poste e detyra në parti, pas 25 prillit, ish-presidenti është pozicinuar si më i ashpri kundër Bashës, duke qenë njeherësh i pari që kërkoi dorëheqjen e tij.
Kjo ka bërë që, për herë të parë, Basha të reagojë ndaj dikujt brenda partisë, në këtë rast Nishanit, gjë nuk e ka aplikuar kurrë si formë reagimi, paçka zërave të shumtë apo të ashpër kundër tij brenda kampit të djathtë.
“E kam nisur fushatën për zgjedhjet brenda partisë me bindjen se nga kjo garë duhet të dalim më të fortë dhe më të bashkuar.
Kam refuzuar reagimet që nxisin përçarje edhe pse çdo ditë ndaj meje janë hedhur sulme personale dhe politike të pavërteta dhe të padrejta. Por çdo gjë e ka një limit.
Ndaj sot hedh poshtë me neveri shpifjen e ulët të Bujar Nishanit. Inati e mllefi personal e ka një limit. Por sot ai limit është kaluar, sepse lidhet me një çështje që ka prekur thellë jo një individ, jo Sali Berishën por gjithë partinë tonë.
Këto shpifje të ulëta i shërbejnë vetëm atyre që bëjnë gjithçka të përçajnë Partinë Demokratike. Dhe unë këtë nuk do ta lejoj”, shkruan Basha.
Por cilat fjalë e kanë nervozuar kaq rëndë të parin e PD-së.
“Unë kam kuptuar se zoti Basha ka qenë në dijeni të informacionit, pasi jo pa qëllim afroi jo në mënyrë të pritur datën e zgjedhjeve brenda partisë. Kjo çështje ka krijuar një shok brenda PD. Se mohojmë dot, pasi Berisha është themelues i PD dhe për të ka ndjeshmëri”, tha Nishani, që ndërkohë zhvlerësoi Bashën politikisht me këto fjalë.
“Basha s’ka asnjë kontribut në PD. Me çfarë? Me kë ta krahasosh se është më i miri?! Njerëzit duhet provuar, elitat po ashtu. Ka njerëz të tjerë që mund të qeverisin më mirë se Basha, dhe të tregojnë veten e tyre. Lider lind, nuk bëhesh. Kryetar nuk lind, bëhesh”, tha ai. /tesheshi.com/
