Ngjan si cinike që Boku – Bojken Lako, të jetë dhe lajm kronike. Edhe në lajme show biz-i, i biri i vetëm i të ndjerin Bujar Lako, një ndër ikonat e kinemasë shqiptare, nuk është fort prezent.
Por ja që për të janë dhënë 3 vite burg nga Gjykata e Tiranës, nën akuzën e një ndërtimi pa leje. Më saktë, për ca dritare të hapura në një godinë të vjetër, ku ai po ndërtonte një studio muzikore.
Thuhet se hetimi ndaj muzikantit të njohur nisi pas një denoncimi nga një qytetar në polici, se në ambientet e një godine në bllokun e ish-magazinave tek ish-NISHARAKU po kryheshin punime pa leje.
Sipas shkresës nga IMT-ja Bashkia Tiranë, thuhet në vendimin e gjykatës, inspektorët kanë konstatuar se po bëheshin punime pa dokumentacion në objekt, që konsiston në hapjen e katër dritareve në njërën faqe të objektit, me përmasa 75x140cm dhe 120x140cm, në katin e dytë të ndërtesës. Ndaj Lakos është mbajtur proces-verbal i konstatimit të kundravajtjes më 17 Shkurt 2021, ndërsa më 26 Shkurt është dënuar me 50.000 lekë gjobë.
“Në Komisariatin e Policisë Nr.2 është njoftuar me telefon nga një qytetar, se në rrugën ‘Shefqet Musaraj’, tek një ndërtesë 2-katëshe të pabanueshme, po kryheshin punime ndërtimore pa leje. Pas njoftimit, është shkuar në vendin e ngjarjes dhe gjatë këqyrjes është konstatuar se kjo godinë ishte në bllokun e ish-magazinave tek ish-NISHARAK.
Nga këqyrja ka rezultuar se në katin e dytë ishte një ambient holl, me përmasa 30 m2 me 7 të përshtatura në dhoma, ku po kryheshin punime ndërtimore. Në dhomën e parafundit nga ana lindore ishte hapur një mur, me përmasa 120×100 cm, një dritare, në dyshemenë e kësaj dhome kishte materiale inerte, tulla dhe llaç, në dhomën e fundit ishte vendosur një dritare duralumini, të gjitha ambientet e brendshme ishin të ndara në dhoma, nuk kishte dyer të vendosura, tavani i hollit të ambientit ishte i pa suvatuar, por i shtruar me parket laminat”, thuhet në dosjen hetimore.
Megjithatë, Bojken Lakos i është konvertuar në “shërbim prove” trevjetëshi që duhej ta kalonte në qeli.
Përkundër këtij rasti ku ai përballet me ligjin, Boku, siç i thërrasin shoqërisht, nuk është aspak një tip me sjellje kontraverse dhe për këtë arsye ka munguar të jetë personazh mediash. Veç prirjes për një luk interesant, ku i mëshon gjithnjë stilit të ndryshuar të flokëve, ai është tejet normal në sjellje shoqërore dhe larg çdo lloj skandali,
Ndër kulmet e karrierës si muzikant, ka të qënit ndër kolonat kryesore të Top Albania Radios dhe më pas të Top Channel. /tesheshi.com/
