Presidenti amerikan Joe Biden dënoi vendimin e Gjykatës Penale Ndërkombëtare (ICC) për lëshimin e urdhërarrestit për kryeministrin izraelit Benjamin Netanyahu dhe ish-ministrin e Mbrojtjes Yoav Gallant.
“Lëshimi i urdhërarresteve të ICC-së kundër udhëheqësve izraelitë është i egër”, tha Biden, duke shtuar:
“Më lejoni të jem i qartë edhe një herë, çfarëdo që mund të nënkuptojë ICC, nuk ka asnjë ekuivalencë, asnjë, midis Izraelit dhe Hamasit.”
Po sigurisht që nuk ka asnjë lidhje mes të dyve dhe në këtë pikë Biden thotë një të vërtetë.
E para, Izraeli është shtet dhe Hamasi organizatë. E dyta, i pari po kryen gjenocid e krime lufte e jo i dyti.
Ai tha se Shtetet e Bashkuara “do të qëndrojnë gjithmonë me Izraelin kundër kërcënimeve ndaj sigurisë së tij”.
Gjykata Penale Ndërkombëtare njoftoi të enjten, më 21 nëntor, se ka lëshuar urdhër-arrest për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime të dyshuara lufte të kryera në territoret palestineze, përfshirë Rripin e Gazës.
Urdhër-arrestet vijnë më shumë se një vit pas fillimit të ofensivës vdekjeprurëse të Izraelit në Rripin e Gazës që ka vrarë rreth 44,000 palestinezë, kryesisht gra dhe fëmijë, dhe ka plagosur më shumë se 103,000 që nga 7 tetori i vitit të kaluar.
Sulmet izraelite kanë zhvendosur brenda vendit pothuajse të gjithë popullsinë e territoreve mes një bllokade të qëndrueshme dhe të qëllimshme që ka çuar në mungesa të rënda të ushqimit, ujit të pastër dhe ilaçeve, duke e shtyrë popullsinë në prag të urisë. /tesheshi.com/
