Kombëtarja shqiptare do e rinis sezonin e ri futbollistik me dy risi: largimin përfundimtar të Lorik Canës dhe rikthimin e Jahmir Hykës
Ka qenë trajneri Gianni De Biasi ai që konfirmoi në një konferencë për shtyp se Lorik Cana është tërhequr nga kombëtarja. “Cana nuk është grumbulluar për ndeshjet e ardhshme pasi është tërhequr”, tha De Biasi, duke shtuar më pas se të rejat e listës janë Rei Manaj dhe Jahmir Hyka.
De Biasi tha se “Europiani ishte ëndrra e Canës. Luajti me Zvicrën dhe një pjesë të ndeshjes me Rumaninë. E mbylli me festë dhe mendoj se meriton një duartrokitje të madhe nga të gjithë ne”.
Ndërsa i pyetur për largimin e disa lojtarëve kosovarë nga kombëtarja kuqezi për të luajtur me përfaqsuesen e Kosovës pas pranimit në FIFA dhe UEFA, De Biasi nuk e konsideroi atë si një eksod, duke dhënë këtë shpjegim: “Nuk shoh asnjë eksod. Kanë ikur ata që erdhën në Austri dhe mbase u zhgënjyen shumë që nuk i morëm në Francë dhe kanë ikur lojtarë si Meha që kishte kohë që nuk ishte më pjesë e kombëtares. Nuk ka eksod, ka lojtarë kosovarë që luajnë për Kosovën”. /tesheshi.com/
