Prishtina, kryeqyteti i Kosovës si çdo vit për 28 Nëntor që nga orët e mëngjesit mbushet me qytetarë të shumtë të cilët vijnë nga mbarë vendi për të festuar.
Fryma kuq e zi që bashkoi shqiptarët në ditët më të vështira ndihet kudo në kryeqytet, por në veçanti në sheshet kryesore të saj “Nënë Tereza”, “Zahir Pajaziti” dhe “Ibrahim Rugova”.
Të shumtë janë edhe qytetarët që me familjet e tyre (bie në sy prezenca e fëmijëve të veshur me rroba kombëtare) dhe shoqëritë e tyre që kanë marrë rrugë sot për në Prishtinë në këtë ditë feste.
Në sheshin “Zahir Pajaziti”, është mbajtur një koncert për fëmijë, derisa në një nga cepet e këtij sheshi, raposodë të vendit, këndonin me çifteli e sharki, derisa pranë tyre rrinin një numër i qytetarëve që dëgjonin këngët, kuptohet kryesisht të moshuar.
Kryeqyteti është i mbushur edhe me tregtarët pjesëmarrës të panairit “Blej Shqip”, të cilët i kanë dhënë hijeshi shesheve kryesore..
Në të tri sheshet e kryeqytetit, qytetarët nënshkruanin edhe peticionin “Drejtësi për Astritin”.
Vlen të theksohet se edhe lokalet pranë shesheve janë të stërmbushur me qytetarë, derisa brenda tyre dëgjohet vetëm këngë patriotike.
Në shesh ndëkohë rrinin një numër i policëve për të monitoruar situatën, në rast të ndonjë problemi eventual.
Gazetari i portalit tesheshi.com ka realizuar disa foto interesante në qendër të Prishtinës, ku shihen qytetarët duke festuar.
