Për tre mujorin e parë të vitit 2017 janë mbi 25 mijë qytetarë që kanë aplikuar për rimbursim nga kuponët fiskalë. Projekti i Administratës Tatimore të Kosovës tashmë ka ardhur më pranë qytetarëve, duke i ftuar ata të aplikojnë për rimbursimin nga kuponët fiskalë.
Në një prononcim për ‘Indeksonline’, zëdhënësja e ATK-së, Valentina Bytyçi ka shpjeguar procesin e aplikimit, rimbursimit, si dhe tërheqjes së numrave potencial fitues.
Ajo tregon se afati i fundit i aplikimit do të jetë në njërën nga datat 1 deri më 10 të muajit pasues, më pas ATK-ja do të organizojë tërheqjen e Numrave Potencial Fitues (NPF), përmes Radio Televizionit Publik të Kosovës.
“Për periudhën TM3 2017 deri me tani kanë aplikuar 26,378 qytetarë. Pas përfundimit të procesit të tërheqjes së Numrave Potencial Fitues, qytetaret të cilët disponojnë Numrin Potencial Fitues të përzgjedhur nga tërheqja, plikon me kuponë fiskal së bashku me të dhënat e aplikimit duhet të dorëzojnë fizikisht të mbyllur, në njërën nga Drejtoritë Rajonale të ATK-së, brenda afatit prej pesë (5) ditë pune pas publikimit të listës në faqen online të ATK-së”, ka thënë Bytyçi.
Më tej, sipas ATK-së në procesin e tërheqjes do të ketë tre (3) Numra Potencialë Fitues, ku numri i përgjithshëm i fituesve është mbi 999 deri 4500.
Mirëpo, në rast se numri i fituesve gjatë tërheqjes është më i vogël atëherë kjo mund të përsëritet.
“Nëse numri i përgjithshëm i fituesve të tërhequr nga Numat Potencial Fitues është më i vogël se një mijë (1,000), atëherë duhet të tërhiqet edhe Numri Potencial Fitues shtesë deri në plotësimin e kushtit të paraparë. Çdo Numër Potencial Fitues i tërhequr ka në vete maksimum një mijë e pesëqind (1,500) fitues, në të kundërtën tërheqja përsëritet”, është shprehur ajo.
Më tej Bytyçi tregon se si do të rimbursohen qytetarët gjatë këtij aplikimi.
“Fituesit potencial do të rimbursohen me dhjetë për qind (10%) të vlerës së deklaruar, por jo më shumë se njëqind euro (100 €)”, ka thënë ajo.
Në fund, ATK konsideron se kampanja për rimbursim ka ndikuar edhe në krijimin e një rregulli dhe kulture në kërkim të kuponit fiskal nga qytetaret.
Po ashtu, sipas tyre është evidente që përmes nxitjes me rimbursim nga kuponët fiskal është krijuar një partneritet mes qytetarëve dhe ATK-së. /tesheshi.com/
