Andaluzianët janë me një këmbë në finalen e Kupës së Mbretit pas fitores 4-0 ndaj Celta Vigo-s në duelin e parë të gjysmëfinales.
Të besuarit e Unai Emery-t kanë përfunduar me sukses misionin e parë në rrugën drejt finales, ndërsa janë treguar tërësisht superiorë ndaj galicianëve, që tani duhet të bëjnë rikthimin e madh në qoftë se dëshirojnë të jenë në finale pas më shumë se një dekade.
Megjithëse Kevin Gameiro nuk do të arrinte të shënonte nga pika e bardhë e 11-metërshit, ishte mbrojtësi Adil Rami ai që i kaloi vendasit në epërsi gjatë pjesës së parë. Gameiro dështoi në përpjekjen e tij të parë, por nuk fali në pjesën e dytë, duke realizuar dy gola.
Llogaritë e ndeshjes i mbylli ish-futbollisti i Celta-s, Krohn-Delhi, që thelloi rezultatin tre minuta para fundit të takimit.
Përmbysja e këtyre shifrave një javë më pas duket gati e pamundur. Teksa Celta Vigo dhe Valencia janë gati të eliminuara, finalja e Kupës së Mbretit do të jetë me shumë mundësi një përballje mes Barcelona-s dhe Sevilla-s. /tesheshi.com/
