Futbolli ka rinisur në Spanjë me një të tetat e Kupës së Mbretit, veprimtaria e dytë futbollistike më e rëndësishme në vend.
Katër prej takimeve të para janë luajtur mbrëmë. Pasi ka humbur trajneri Prandelli në ditët e fundit të dhjetorit, të dorëhequr, Valencia ka marrë një tjetër goditje, duke u mundur 1-4 nga Selta Vigo. Një rezultat që e bën eliminimin për Valencian thuajse të sigurt, ndërkohë që skuadra është në pozitë të vështirë dhe në kampionat.
Atletiko e Madridit bëri një hap të madh drejt çerekfinaleve me fitoren 0-2 në fushën e Las Palmasit. Koke e Griezmann ishin shënuesit për skuadrën e Madridit, që e nis mbarë vitin.
Një tjetër fitore në transfertë qe ajo e Eibarit, që mposhti pastër, 0-3, Osasunën. Barazimi i vetëm u regjistrua në takimin Alaves – Deportivo la Korunja, të përfunduar 2-2.
Reali i Madridit pret Seviljen këtë të mërkurë, në përplasjen më të fortë të një të tetave. Në “Santiago Bernabeu” do të mungojë Ronaldo, i lënë pushim nga Zidane. Një tjetër mungesë do të jetë ajo e Sergio Ramos-it.
Alkorkon – Kordova dhe Real Sociedad – Vilareal janë dy takime të tjera të kësaj mbrëmjeje.
Për mbajtësit aktualë të trofeut, Barcelonën, do të ketë të enjten një transfertë të vështirë, në sfidën ndaj Atletik Bilbaos. /tesheshi.com/
