Blaugranasit bënë mbrëmë një hap të sigurt përpara drejt çerekfinales së Kupës së Mbretit, ndërsa i mposhtin 4-1 fqinjët e Espanjolit. Një ndeshje e tensionuar, ashtu si në kampionat, që pati gola të shumtë, dy kartona të kuq, e shumë emocione të tjera. Me të tjerash, me bluzën e Barcelonës luajti për herë të parë dhe turku Arda Turan, i blerë në verë nga Atletiko e Madridit.
Vendasit u detyruan të përmbysin disavantazhin ku u gjendën që në fillim të ndeshjes. Ishte argjentinasi Lionel Messi që me dy gola të bukur përmbysi gjithçka në pjesën e parë të lojës.
45-minutëshi i dytë ishte histori më vete. Qe qendërmbrojtësi Gerard Pique ai që e thelloi epërsinë pas një pasimi të mrekullueshëm nga Messi. Gjërat u përkeqësuan për mysafirët pas nxjerrjes nga loja me karton të kuq të Hernan Perez-it dhe Pape Diop-it, duke i luajtur kështu minutat e fundit të ndeshjes me dy futbollistë më pak në fushë.
Ndeshja u mbyll me një gol të bukur të brazilianit Neymar, që pasi shërbehet bukur nga Messi, e çon topin për herë të katërt në rrjetën e portës së miqve. Fitorja e thellë ishte një lloj hakmarrjeje e Barcelonës për barazimin pa gola të së shtunës së kaluar në kampionat në fushën e Espanjolit. /tesheshi.com/
