E papritura e çerekfinaleve të Kupës së Ligës në Angli ishte pa dyshim eliminimi i Arsenalit.
Me një përbërje krejt ndryshe të zakonshmes, Arsenali u mund në shtëpi 0-2 nga Sauthemptoni.
Një humbje që i dha fund serisë prej 19 ndeshjesh me rezultate pozitive të Arsenalit. Një Arsenal që nuk mposhtej prej 14 gushtit, kur Liverpuli fitonte 3-4 në kampionat.
Ndërkohë, Mançester Junajtedi, ndryshe së dielës, kur barazonte 1-1 me Uest Hemin në Premier League, fitoi 4-1 mbrëmë ndaj së njëjtës skuadër, duke u kualifikuar për në gjysmëfinale.
Një ditë më herët, Liverpuli eliminoi Lids Junajtedin, pasi fitoi 2-0.
E vetmja ndeshje që kërkoi 11-metërsha qe ajo mes Hall Sitit dhe Njukasëllit. Golat në barazimin 1-1 u shënuan në shtesat pesëmbëdhjetëminutëshe; Hall Siti kryesoi 3-1 në gjuajtjet e penalltive.
Gjysmëfinalet e Kupës së Ligës janë Mançester Junajted – Hall Siti dhe Sauthempton – Liverpul. Takimet e para do të luhen më 10 janar, e të dytat më 24 të të njëjtit muaj. /tesheshi.com/
