Një gol i Stephan Lichtsteiner-it në pjesën e dytë të lojës u dha biankonerëve fitoren përballë Lacios në “Olimpico”, dhe njëherësh u mundësoi arritjen në gjysmëfinalen e Kupës së Italisë.
Të besuarit e Allegri-t u befasuan fillimisht nga nikoqirët, që kishin përgatitur një ndeshje speciale dhe me shumë raste shënimi, por që mbetën të pakonkretizuara. Lojtarët e Juventusit arritën që ta balancojnë lojën, duke gjetur dhe golin në minutën e 66-të.
Megjithëse Lacio u përpoq deri në fund të ndeshjes t’i barazonte shifrat, nuk ia doli, për t’u pajtuar në mbarim të 90 minutave me humbjen 0-1 e me eliminimin.
Një prej gjysmëfinaleve të Kupës së Italisë sjell kështu një përplasje mes Juventusit dhe Interit, në një përballje që premton të ofrojë gjithçka. /tesheshi.com/
