Maroku, Spanja dhe Portugalia janë zgjedhur si organizatorë të Kupës së Botës 2030 dhe ku tre ndeshje do të luhen në Amerikën e Jugut, njoftoi Federata Ndërkombëtare e Futbollit (FIFA).
Oferta e përbashkët e Marokut, Portugalisë dhe Spanjës ishte kandidati i vetëm për të pritur eventin më të madh të futbollit botëror.
Tri ndeshjet e atij Botërori do të luhen në Uruguaj, Argjentinë dhe Paraguaj, me rastin e shënimit të 100-vjetorit të turneut, i cili për herë të parë u mbajt në vitin 1930 në Uruguaj.
Kreu i Federatës së Futbollit të Amerikës Jugore CONMEBOL, Alejandro Dominguez, tha se Uruguai, Argjentina dhe Paraguai do të jenë mikëpritëse të tri ndeshjeve të para të Kupës së Botës.
Ky vendim do të konfirmohet zyrtarisht në Kongresin e FIFA-s në vitin 2024.
Është hera e parë që ËC do të mbahet në tre kontinente dhe në gjashtë vende.
“Këshilli i FIFA-s ka rënë dakord unanimisht që oferta e vetme e Marokut, Portugalisë dhe Spanjës do të jetë nikoqire e ngjarjes në vitin 2030”, njoftoi FIFA.
“Për më tepër, duke marrë parasysh kontekstin historik të Kupës së Parë Botërore, Këshilli njëzëri ra dakord që Montevideo do të organizojë një ceremoni unike për të festuar 100-vjetorin dhe se tre ndeshje të Kupës së Botës do të luhen në Uruguaj, Argjentinë dhe Paraguaj”.
Kupa e Botës 2030 do të mbahet kështu në dy vende evropiane (Spanjë dhe Portugali), një afrikan (Marok) dhe tre të Amerikës së Jugut (Uruguai, Argjentinë dhe Paraguaj).
“Në një botë të ndarë, FIFA dhe futbolli bashkohen”, tha presidenti i FIFA-s, Gianni Infantino.
Botërori i ardhshëm është planifikuar për në vitin 2026 dhe do të organizohet nga SHBA, Meksika dhe Kanadaja. /tesheshi.com/
