Kunjat prej pambuku përdoren për pastrimin e veshëve, por janë të rrezikshme pikërisht për këtë pjesë të trupit. Në të gjitha konfeksionet është e shkruar se nuk këshillohet që këto kunja të futen në kanalin e veshit, por konsumatorët vijojnë t’i blejnë dhe t’i përdorin.
Në Washington Post, gazetari Robert A. Ferdman tregon se nëna e tij kishte filluar të kishte një dëgjim më të dobësuar si dhe dhimbje veshi, si pasojë e përdorimit për një kohë shumë të gjatë të këtyre kunjave prej pambuku. “Është i vetmi produkt, përdormi kryesor i së cilit është ekzaktësisht ai që nuk këshillohet nga kompanitë e prodhimit”,- thotë gazetari në shkrimin e tij.
Këta shkopinj janë krijuar për një funksion tjetër nga Leo Gerstenzang, i cili i nxori në treg në vitin 1923, pasi pa bashkëshorten e tij duke pastruar lëkurën e fëmijës së vogël me disa shkopinj të rrethuar nga pambuku.
Washington Post shtron pyetjen se përse, ende shumë persona i përdorin këto kunja për të pastruar veshët. “Arsyeja e vërtetë pse ende vijojmë të përdorim këto kunja me pambuk për të pastruar veshët është e thjeshtë: ndjenja që marrim është fantastike. Veshët tanë janë të veshur me mbaresa nervore, të cilat dërgojnë sinjale në pjesët e tjera të trupit.
Gudulisja në pjesët e brendshme stimulon një ndjenjë kënaqësie, por jo vetëm kaq. Përdorimi i kunjave me pambuk shkakton atë që dermatologët e cilësojnë si “prurito-grattamento”, një formë e vogël e varësisë që ushqehet në mënyrë automatike. Një cikël vicioz në të cilin sa më shumë përdoret kruajtja, aq më shumë rritet dëshira për ta ripërdorur kunjën me pambuk. /tesheshi.com/
