Inteligjenca ushtarake britanike njoftoi të shtunën se forcat ushtarake ukrainase po kërcënojnë tani kontrollin rus të qytetit Kupyansk dhe se kapja e tij do të ishte një goditje e madhe për Rusinë pasi qyteti ndodhet në rrugët ruse të furnizimit për në fushat e betejës në Donbas.
Media bjelloruse Nexta ka publikuar në Twitter një foto ku ushtarët ukrainas me flamurin ukrainas në duar po pozojnë para qendrës administrative në Kupyansk.
Presidenti ukrainas Volodymyr Zelensky njoftoi në fjalimin e tij të përditshëm me video të premten në mbrëmje se forcat ukrainase kanë kapur më shumë se 30 qytete dhe fshatra në Ukrainën lindore në rajonin e Kharkiv.
“Ne po marrim gradualisht kontrollin e vendbanimeve të reja,” tha Zelensky.
“Kudo që të kthejmë flamurin ukrainas dhe mbrojtjen për popullin tonë”.
Ai theksoi se “luftimet e ashpra” vazhdojnë në rajonin e Donbasit në lindje të Ukrainës, si dhe në jug të vendit.
Në herët, u njoftua se ushtria ukrainase ka rifituar kontrollin mbi qytetin e Balaklia, që ndodhet në juglindje të rajonit të Kharkiv.
“Çdo gjë është në vendin e vet. Flamuri ukrainas, Ukraina e lirë, qyteti i lirë ukrainas nën qiell. Faleminderit. Jam krenar”, tha Zelensky.
Në njoftimin e sotëm të ushtrisë ukrainase thuhet se më shumë se 20 vendbanime në rajonin e Kharkiv janë përsëri nën kontrollin e Ukrainës.
Guvernatori i administratës ushtarake të rajonit të Kharkiv, Oleg Sinegubo, njoftoi se forcat ukrainase kryen kundërsulme të forta kundër forcave ruse në Kharkiv.
“Gjatë operacioneve mbrojtëse për të rikuperuar territorin e humbur në drejtim të Kharkiv, që nga fillimi i javës, forcat e armatosura ukrainase kanë depërtuar në linjat e armikut në një thellësi deri në 50 kilometra,” tha gjeneral brigade ukrainas Oleksiy Gromov në një konferencë në Kiev.
