Gjykata Europiane e Drejtësisë, ECJ, vendosi dje se punëdhësit mund t’i pengojnë të punësuarit që të mbajnë simbole fetare, mes të cilave përfshihet dhe shamia e kokës për femrat muslimane.
Vendimi i kësaj gjykate, që e përcakton si të ligjshme një praktikë të tillë të punëdhënësve, i hap më tej rrugë diskriminimit të muslimaneve dhe ua bën të pamundur mbajtjen e shamisë së kokës në vendet e punës.
Një vendim i tillë i ECJ-së ka ndeshur në kundërshti që në momentet e para. Mes organizmave që kanë shprehur pakënaqësinë ndaj tij është Amnesty International, që ka deklaruar se vendimi u jep liri më të madhe veprimi punëdhënësve për t’i diskriminuar të punësuarit në bazë të besimit fetar. I njëjti organizëm ka kërkuar reagim ndaj këtij vendimi.
Rrjeti Europian Kundër Racizmit, ENAR, është shprehur përmes drejtueses së tij, Amel Yacef, se bëhet fjalë për një vendim tejet shqetësues, ngase i ndalon efektivisht të gjitha femrat që të mbajnë shami koke në vendin e punës.
Vendimin e Gjykatës Europiane të Drejtësisë e kritikoi ashpër dhe Këshilli Qendror i Muslimanëve në Gjermani.
“Me vendimin e tyre, gjykatësit e Gjykatës së Drejtësisë së Bashkimit Europian kanë hapur derën për diskriminimin e mëtejshëm të femrave muslimane në Europë dhe i kanë kufizuar më tej mundësitë ligjore për kundërshtimin e masave të tilla diskriminuese,” thuhej në një deklaratë për shtyp të këtij organizmi.
Kryeministri turk e quajti po ashtu të papranueshëm këtë vendim në një intervistë të drejtpërdrejtë në disa televizione të vendit të tij.
“Kjo është shumë e gabuar. Nuk ka asgjë të pranueshme në këtë [vendim]. Ai është kundër të drejtave të njeriut, kundër lirisë së besimit dhe kundër lirisë së veshjes,” do të shprehej Binali Yıldırım. /tesheshi.com/
