Gjykata Kushtetuese do të shprehet në lidhje me ankesën e Unionit dhe Shoqatës së Gjyqtarëve për disa ligje të reformës në drejtësi dhe vettingut në datën 28 shtator.
Në seancën e që do të mbahet në këtë datë, anëtarët e kësaj gjykate do të dëgjojnë palët dhe më pas pritet të merret edhe vendimi.
Janë 22 nene të ligjit, “Për organet e qeverisjes së sistemit të drejtësisë”, atij “Për statusin e gjyqtarëve dhe prokurorëve në Republikën e Shqipërisë” dhe ligjit “Për rivlerësimin kalimtar të gjyqtarëve dhe prokurorëve në Republikën e Shqipërisë”, për të cilat shoqata e gjyqtarëve ka kërkuar shfuqizimin si antikushtetues, shkruan Panorama.
Në kërkesën e Unionit dhe Shoqatës së Gjyqtarëve, thuhet se disa nene që përcaktojnë kushtet e përzgjedhjes së anëtarëve për Këshillin e Lartë Gjyqësor dhe Këshillin e Lartë të Prokurorisë, bien ndesh me Kushtetutën e vendit. Konkretisht, kërkohet nga Kushtetuesja shfuqizimi i nenit 7, pika A dhe C, ku përcaktohet se gjyqtarët në kohën e kandidimit për Këshillin e Lartë Gjyqësor, duhet të kenë ushtruar funksionin e gjyqtarit për të paktën dhjetë vjet dhe të jenë të vlerësuar “shumë mirë” në dy vlerësimet e fundit të performancës etike dhe profesionale.
Kërkohet gjithashtu edhe shfuqizimi i pikës 1 të nenit 59, ku thuhet se kryetari dhe zv.kryetari i Këshillit të Lartë Gjyqësor zgjidhen në mbledhjen e parë të KLGJsë nga radhët e anëtarëve që nuk janë gjyqtarë dhe me shumicën e thjeshtë të votave të anëtarëve.
Gjyqtarët kërkojnë gjithashtu ndryshim edhe në pikën 8 të nenit 62, ku thuhet se Komisioni i Planifikimit Strategjik dhe Administrimit të Buxhetit përbëhet nga dy anëtarë jogjyqtarë dhe një anëtar gjyqtar.
Ata kërkojnë që të hiqen fjalët “dy anëtarë jo gjyqtarë dhe një anëtar gjyqtar”. E njëjta gjë kërkohet edhe për pikën 13 të nenit 62, që përcakton shqyrtimin e ankimimeve të vendimeve të Inspektoratit të Lartë të Drejtësisë. Kërkesa e Unionit dhe Shoqatës së Gjyqtarëve është bërë që më datë 25 maj dhe mësohet se është pranuar nga Gjykata Kushtetuese. /tesheshi.com/
