Përfaqësues të opozitës siriane u takuan ditën e djeshme në Kajro, në përpjekje për të krijuar një aleancë më të gjerë kundër presidentit Beshar Esad.
Në tubimin dyditor janë të pranishëm politikanë shekullarë dhe përfaqësues fisnorë, e gjithashtu përfaqësues të Ushtrisë së Lirë Siriane.
Sipas organizatorëve, ky grupi i ri do të ofrojë një alternativë përkundër Koalicionit Kombëtar, bllokut opozitar në mërgim, të njohur e të përkrahur nga qeveritë perëndimore dhe arabe.
Mes të pranishmëve ishin dhe përfaqësues të një grupi opozitar të toleruar nga regjimi sirian, të Komitetit të Koordinimit Kombëtar për Ndryshim Demokratik.
Sipas organizatorëve, kjo aleancë do të dallonte nga Koalicioni Kombëtar, dhe do të ishte e gatshme të bisedonte me përfaqësues të regjimit të Esadit për formimin e një qeverie kalimtare.
Ministri egjiptian i Punëve të Jashtme, Samih Shykry, e quajti konferencën vetëm një pikënisje. Në fjalën e tij në sesionin e hapjes, ai tha mes të tjerash, “Kemi për të punuar së bashku për t’ia përcjellë Sirisë dhe botës mesazhin dhe vizionin tuaj.” Shykry shtoi po ashtu, “Procesi politik ka ngrirë prej kohësh, dhe përshkallëzimi i operacioneve ushtarake është bërë më tërheqës për përpjekjet rajonale dhe ndërkombëtare, të tëra në kurriz të një zgjidhjeje politike.”
Egjipti qe bërë dhe në janar vendi pritës i një takimi, ku figurat opozitare hartuan një dokument me dhjetë pika që mbështeste zgjidhjen politike dhe kundërshtonte çdo prani të huaj ushtarake në Siri.
Fraksionet rebele islame nuk janë pjesë e konferencës.
Organizatorët e bënë të qartë se takimi synon të gjejë një formulë për ta qeverisur Sirinë sipas bisedimeve të mëhershme të mbështetura nga OKB-ja, që parashikonin një organ qeverisës kalimtar me figura opozitare dhe anëtarë të qeverisë së Esadit. /tesheshi.com/
