Kundërshtarët e Erdoganit, ftesë kundërshtarit të Ramës në Turqi

Presidenti Meta ka ndarë me opinionin dëshirën e tij për të vizituar Turqinë, i ftuar jo nga pushteti por nga opozita.

Ai ka pritur në zyrën e tij një bashkiak të opozitës turke, duke thënë se ka marrë një ftesë nga ai në emër të kreut të opozitës në Turqi.

“Pata kënaqësinë të pres sot Kryetarin e Bashkisë së Maltepe të Turqisë, z.Ali Kiliç, me të cilin patëm një diskutim të frytshëm mbi marrëdhëniet e shkëlqyera dhe miqësore midis dy vendeve dhe popujve tanë.

Më përcolli përshëndetjet e ngrohta të Liderit të Opozitës në Turqi, Kryetarit të Partisë Republikane, z.Kemal Kiliçdaroglu, si edhe ftesën e tij për të vizituar së afërmi Turqinë, të cilën e pranova me shumë kënaqësi.

Forcimi i miqësisë së sinqertë midis dy vendeve tona është interes i gjithanshëm dhe afatgjatë i dy popujve tanë!”, shkruan Meta.

Shkon kjo ftesë në të njëjtën linjë me zhvillimet politike në Shqipëri. Kundërshtarët e Erdoganit ftojnë për vizitë kundërshtarin e Ramës, mikun e ngushtë të presidentit turk. /tesheshi.com/