Nga Blendi Gashi
Ministrja e Kulturës së Shqipërisë, Mirela Kumbaro thotë se ambasadorët shqiptarë në Paris dhe ministri i Jashtëm Ditmir Bushati janë duke dhënë kontributin e tyre në përkrahjen e anëtarësimit të Kosovës në UNESCO.
Kumbaro tha se duhet vazhduar lobimi derisa ditën e hënë (9 nëntor) kur edhe do të ndodh votimi, duhet pritur me durim.
“Besoj shumë që është kaq e natyrshme dhe e merituar kërkesa saqë do të duhet të heq votat e duhura për ta kryer këtë objektiv.
Çdo lobim ka vështirësitë e veta pasi nuk bëhet fjalë për një numër të vogël vendësh, por për një numër të madh dhe bëhet fjalë për dy të tretat e votave dhe kjo përveç forumeve kërkon edhe një bisedim kokë me kokë me shtetet e ndryshme.
Ambasadorët tanë në Paris dhe vet ministri i Jashtëm kanë qenë shumë aktiv në tryeza dhe në kordinim të plotë me Ministrinë e Jashtme të Kosovës. Sot ishin në biseda me ministrin Hashim Thaçi dhe zv.ministrin Petrit Selimi i cili ka bërë një punë të jashtëzakonshme. Ka momente kur shtohen zërat që ndjejmë më shumë optimizëm dhe kur debati bëhet më i vështirë”, tha ajo, në një intervistë dhënë për Televizionit Publik të Kosovës, transmeton portal mbarëkombëtarë tesheshi.com.
Ministrja Kumbaro përmendi edhe pengesën që është duke e bërë në vazhdimësi Serbia për të penguar anëtarësimin e Kosovës në UNESCO.
“Nuk bëhet fjalë për t’i marrë diçka dikujt, por për të qenë gjithë bashkë dhe kjo është qasja jonë për të qenë në të njëjtën familje për të mbrojtur trashëgiminë kulturore. Nuk është çështja e vetëm një vendi, gjithë Ballkani përfiton kur një vend i rajonit shtohet në familjen e UNESCO-s. Nuk mund ta bëjmë trashëgiminë kulturore duke qenë jashtë organizatës por duke qenë gjithë brenda. Ajo që është për të ardhur keq, është një politizim i tejskajshëm që i bëhet anëtarësimit, që është në mbrojtje të kulturës dhe jo në mbrojtje të një politike të caktuar”, tha Kumbaro.
/tesheshi.com/
