Banorët e lagjes së Trimave në Kumanovë, shtëpitë e të cilëve u shkatërruan nga përleshjet e armatosura të 9 dhe 10 Majit, kanë mundur të marrin paratë e kompensimit për banesat e tyre.
Autoritetet njoftuan se gjatë fundjavës është kryer lëvrimi i parave. Një gjë e tillë konfirmohet edhe nga vetë banorët, një pjesë e të cilëve tashmë kanë nisur punën për rindërtimin e shtëpive.
Nga luftimet e majit në “Lagjen e Trimave” janë shkatërruar 66 shtëpi, e janë 121 familje që kanë pësuar dëme materiale.
Ngjarjet e Kumanovës ndodhen tashmë në proces hetimi nga autoritetet e ligjit, ndërsa zyrtarisht është ngritur padi ndaj 33 personave. Nga përleshjet e dy ditëve u vranë tetë policë dhe dhjetë pjesëtarë të grupit të armatosur, e me dhjetëra u plagosën.
30 prej grupit të armatosur u dorëzuan. Autoritetet në Shkup po e trajtojnë këtë ngjarje me qëllime sulm terrorist ndaj institucioneve të Maqedonisë, ndërsa nuk kanë munguar apelet për një hetim të pavarur ndërkombëtar. /tesheshi/
