Sulmuesi kumanovar i Young Boysit të Zvicrës, Taulant Seferi ka vendosur t’i bashkohet kuqezinjve.
Futbollisti që ka luajtur për gjithë kategoritë e reja të Maqedonisë, madje duke zhvilluar edhe dy takime për përfaqësuesen A, duke u bërë futbollisti në moshë më të re që ka debutuar për ekipin e parë, ka vendosur të ndryshojë pasaportën futbollistike dhe në të ardhmen të luajë me Shqipërinë.
Lajmin e ka konfirmuar vetë futbollisti në profilin e tij në fejsbuk, ku flet me tone falënderuese për Maqedoninë, porse bashkë me familjen kanë vendosur të përfaqësojë Shqipërinë.
“Kam qenë në një udhëkryq, pasi në njërën anë ishte respekti dhe mirënjohja për Maqedoninë, ndërsa në anën tjetër zemra dhe dëshira për të përfaqësuar përfaqësuesen e kombit tim, Shqipërinë. Kemi analizuar mirë këtë situatë dhe bashkë me familjen time kemi vendosur që në të ardhmen unë të përfaqësoj Shqipërinë. Do Zoti të kem sukses, me shpresë që këtë vendim timin ta mirëkuptojnë të gjithë”, ka shkruar futbollisti Taulant Seferi. /tesheshi.com/
