Kultura ka afruar Rusinë me shtetin tonë që para viteve ’90, sidomos përmes bashëpunimeve dhe shkëmbimeve të përvojave në fushën e koreografisë. Ministrja e Kulturës Mirela Kumbaro dhe homologu i saj Vladimir Medinskiy nënshkruan një marrëveshje bashkëpunimi në Forumin V Ndërkombëtar të Kulturës në Shën Petërburg për vitet 2017-2019, ku Kumbaro ishte e ftuar.
Bëhet fjalë për një platformë të njohur shkëmbimesh të politikave kulturore të nivelit të lartë, të përvojave më të mira ndërkombtare në fushën e prodhimeve skenike, të mbrojtjes së trashëgimisë kulturore dhe një dialog i hapur për të ardhmen e trashëgimisë botërore dhe bashkëpunimeve në lëmin e artit.
Ministrja Kumbaro referoi në panelin kushtuar ruajtjes dhe promovimit të trashëgimisë kulturore ku morën pjesë delegacione të nivelit të lartë nga Franca, Sllovenia, Greqia, Italia, Serbia, Rusia, dhe Britania e Madhe. Për gjatë dy orëve u shkëmbyen përvoja të metodave të reja në ruajtjen dhe menaxhimin e promovimin e pasurive kulturore nga vendet pjesëmarrëse.
Ministrja Kumbaro theksoi rolin e rëndësishëm që luan promovimi i trashëgimisë kulturore për bashkëpunimin dhe komunikimin me partnerët ndërkombëtarë dhe posaçërisht me Federatën Ruse, në kuadrin e nënshkrimit të marrëveshjes kulturore,
Gjatë ditëve të Forumit, Ministrja Mirela Kumbaro zhvilloi gjithashtu një leksion të hapur me studentë dhe pedagogë të Universitetit të Shën Petërburgut, me temën “Komunikimi përmes kulturës si faktor bashkëpunimi ndërkombëtar dhe kohezioni social”.
Me shumë interes ishte takimi i Ministres së Kulturës së Shqipërisë, Mirela Kumbaro, me Rektoratin e Universitetit të Shën Petërburgut, gjatë të cilit u konfirmua sërish vullneti i këtij Universiteti për të vijuar në vitin e ardhshëm me bursa për studentë shqiptarë, si dhe u ideuan projekte të reja bashkëpunimi edhe në fushën e kulturës dhe të biznesit me një nga Universitetet më prestigjioze të Federatës Ruse që sot numëron mbi 35 000 studentë. Forumi V Ndërkombëtar i Kulturës zhvilloi punimet e tij nga data 1-3 dhjetor 2016. /tesheshi.com/
