Ditë pasi kreu i Rendit, Saimir Tahiri iu drejtua shqiptarëve me lutje për t’i dorëzuar armët që mbajnë pa leje, ato pra që janë të rrëmbyera në depot e ushtrisë që në vitin 1997, ku për më tepër shfaqi dhe ankesë për videoklipe muzikore ku promovohet arma dhe vrasjet, ja ku shfaqet Çiljeta me një poster ku porsi një kaubojse post-moderniste jua drejton dy pistoleta gjithë atyre vështrimeve njerëzore që ngërthehen drejt saj.
Çiljeta vërtet vjen nga e djathta si shije politike; madje për një fare kohe ajo ishte dhe sex-girl-i politik i PD-së kur përqafej me Berishën majë tribunave; por nuk ngjan se armëmbajtja e saj është sfidë ndaj së majtës. Ajo është sfidë e hapur, deri në triumf, ndaj një shteti që nuk ka pikë ndjeshmërie për përgjegjesitë e veta morale e sociale ndaj njerëzve në shërbim të së cilëve duhet të jetë.
Ministri Tahiri u drejtohet me apel ca videoklipbërësve – që çuditërisht i quajti artistë – pasi nuk ka kompetenca ligjore që do mund t’u diktonte etikën e përmbajtjes së tyre duke jua hequr fillin militar që i përshkron; por ai tashmë duhet t’i drejtohet dhe shtetit, pjesë e të cilit është, për t’i kujtuar që nuk mund të bëhet njësh me promovimin e kultit të armës. /tesheshi.com/
